लॉकडाउन : हातभट्टीला आले ‘अच्छे दिन’...

नांदेड : कोरोनाचा प्रादूर्भाव रोखण्यासाठी जाहीर केलेल्या लॉकडाउनमध्ये शहरातील मद्य विक्रीची दुकाने बंद आहेत. जवळपास ५० दिवस उलटून गेल्याने तळीरामांच्या जीवाचा तिळपापड होत आहे. शेवटी काहीजण नशा तर काही हौसेपोटे मद्य (दारु) मिळत नसल्याने चक्क हातभट्टी गळी उतरविण्यासाठी तळीरामांचे पाऊले आता ग्रामिण भागाकडे वळले आहेत. त्यामुळे हातभट्टीला ‘अच्‍छे दिन’ आल्याचे बोलल्या जात आहे.  

कोरोना या महाभंयकर आजाराने सध्या जगातील काही महासत्ता देशांसह संबध जगाला विळखा घातला आहे. यात लाखोंचा बळी या आजाराने घेतला असून बळींच्या तीस पट नागरिकांना या आजाराची बाधा झाली आहे. या आजाराचा प्रादूर्भाव रोखण्यासाठी संबंध जगभरात लॉकडाउन करण्यात आले आहे. भारतातही तिसरा लॉकडाउन ता. १७ मेपर्यंत सुरू आहे. याकाळात गरजेशिवाय नागरिकांनी घराबाहेर पडू नये असे आवाहन प्रशासनाकडून केल्या जात आहे. तसेच लॉकडाउन काळात अत्यावश्‍यक सेवेच्या दुकानाशिवाय अन्य आस्थापना बंद आहेत. त्यात मद्यांची सर्व दुकाने बंद असल्याने तळीरामांना मात्र चांगलाच या लॉकडाउनने घाम फोडला आहे. 

हेही वाचा - ‘ती’च्या येण्या जाण्याने नांदेडकरांच्या डोक्याला ताप

मद्याची दुकाने बंद केल्याने शासनालाही मोठा आर्थीक भुर्दंड 

मागील ५० दिवसापासून सुरू असलेल्या लॉकडाउनमुळे नियमीत मद्य सेवन करणाऱ्यांची चांगलीच पंचायत झाली आहे. मद्याची दुकाने बंद केल्याने शासनालाही मोठा आर्थीक भुर्दंड सहन करावा लागत आहे. दारु दुकानामुळे राज्यात सर्वाधीक महसुल मिळवून देणारा हा विभाग आहे. सुरवातीला काहीनी मद्याचा साठा करुन ठेवला होता. परंतु लॉकडाउन वाढत गेल्याने पदरमोड मद्य संपले. आता काय करायचे म्हणून चक्क तळीरामांचा मोर्चा हातभट्टीकडे वळला आहे. नशेची सवय जडलेल्या तळीरामांना कोसोदूर पायी जावून शरिराला घातक असलेली हातभट्टी, शिंदी असे मद्य गळी उतरावे लागत आहे.

येथे क्लिक करा - ‘यांच्या’ अखंडित सेवेमुळे आपण घरात सुखरूप आहोत, कोणामुळे? ते वाचलेच पाहिजे

हातभट्टीचे माहेरघर चिकाळा तांडा (ता.मुदखेड)

मात्र हातभट्टी व अवैध दारु विक्री करण्यांवर राज्य उत्पादन शुल्क व पोलिस विभागाकडून करडी नजर ठेवून कारवाई करण्यात येत आहे. हातभट्टीचे माहेरघर बनलेल्या चिकाळा तांडा (ता.मुदखेड) परिसरात दररोज छापा, तरीही रोज हातभट्टीची निर्मिती काही केल्या थांबत नसल्याचे दररोजच्या कारवाईवरुन दिसून येते. हातभट्टी कशीही असो ती आपल्या गळी उतरली पाहिजे यासाठी तळीराम चढ्या दराने ती घेण्यासाठी कोसो दूर पायी जात असल्याने हातभट्टीला अच्छे दिन आल्याचे बोलल्या जात आहे.