Nanded News : नांदेडला पुनर्तपासणीत नोंद नाही

नांदेड : मराठा - कुणबी नोंदीच्या मराठवाड्यातील छत्रपती संभाजीनगर, लातूर आणि नांदेड येथे कमी सापडल्या होत्या. त्यामुळे सेवानिवृत्त न्यायमुर्ती संदीप शिंदे आणि त्यांच्या समितीने पुन्हा नोंद तपासण्याच्या सूचना केल्या होत्या. त्यानुसार जिल्हाधिकारी अभिजीत राऊत यांनी पुनर्तपासणीच्या सूचना यंत्रणेला दिल्या होत्या. दरम्यान, यात कुणबी, कुणबी - मराठाची एकही नोंद आढळली नाही. त्यामुळे आत्तापर्यंत एक हजार २०४ नोंदीच आढळून आल्या आहेत.

आंदोलनकर्ते मनोज जरांगे पाटील यांनी मुख्यमंत्री एकनाथ शिंदे यांच्याशी संपर्क साधून नोंदी कमी सापडल्यामुळे याबाबत काही ठिकाणी आक्षेप घेऊन हा प्रकार लक्षात आणून दिला होता. त्यानंतर मराठा आरक्षणाचे आंदोलन सुरू झाल्यानंतर मुख्यमंत्री एकनाथ शिंदे यांनी कुणबी, मराठा-कुणबीच्या नोंदी शोधणे आणि त्यावर अभ्यास करण्यासाठी सेवानिवृत्त न्यायमूर्ती संदीप शिंदे यांच्या अध्यक्षतेखालील एक विशेष समिती गठित केली. त्या समितीने मराठवाडा आणि विदर्भात तसेच नंतर राज्यभरात कुणबी नोंदी शोधण्याच्या अनुषंगाने काम सुरू केले आहे.

दरम्यान, जिल्हाधिकारी राऊत यांनी कुणबी नोंदी शोधकार्यात विशेष लक्ष घालून हयगय करणा-या अधिकारी, कर्मचाऱ्यांचे कान टोचले होते. तसेच मोडी लिपीत अथवा इतर भाषेतील दस्तावेजाची संबंधित अभ्यासकांकडून तपासणीच्या सुचना दिल्या होत्या. त्यानुसार यंत्रणेने पुनर्तपासणी केली परंतू, यात एकही नोंद आढळली नसल्याची माहिती सुत्रांनी दिली आहे.

हैदराबादलाही गेली होती समिती

मराठवाडा हा पूर्वी निजाम संस्थानात होता. त्यामुळे हैदराबाद येथे काही नोंदी सापडण्याची शक्यता होती. त्या अनुषंगाने मराठा कुणबीच्या नोंदीची पाहणी आणि आढावा घेण्यासाठी सेवानिवृत्त न्यायमुर्ती संदीप शिंदे आणि त्यांच्या समितीतील सदस्य तसेच मराठवाड्याचे विभागीय आयुक्त मधुकरराव आर्दड हे ता. सहा डिसेंबर दरम्यान तेलंगणातील हैदराबादला गेले होते. त्यांच्यासोबत नांदेडचे अतिरिक्त जिल्हाधिकारी पांडुरंग बोरगावकर यांच्यासह देगलूरचे उपविभागीय अधिकारी कुलदीप जंगम व इतरही अधिकारी, कर्मचारी होते. या समितीने तेथे पाहणी केली मात्र, त्यांना किती नोंदी आढळल्या किंवा इतर माहिती अद्याप मिळू शकली नाही.