Nanded News : दाजीची भाऊजीला धोबीपछाड,दहा जागा जिंकून बाजार समितीवर कब्जा

कंधार - तालुक्यासह जिल्ह्यातील राजकारणात लक्षवेधी ठरलेल्या कंधार कृषी उत्पन्न बाजार समिती निवडणुकीत अपेक्षेप्रमाणे खासदार प्रताप पाटील चिखलीकर प्रणित बळीराजा परिवर्तन पॅनेलने बाजार समितीवर वर्चस्व सिद्ध केले. दाजी-भाऊजी यांच्या लढाईत दाजीने भाऊजीला धोबीपछाड दिली असून १८ पैकी दहा जागा जिंकून चिखलीकर गटाने या निवडणुकीत आपला ठसा उमटविला आहे.

भाजप, शिवसेना शिंदे गट आणि राष्ट्रवादी काँग्रेस यांचा बळीराजा परिवर्तन पॅनेल, काँग्रेस आणि शेकाप यांचा शेतकरी विकास पॅनेल आणि बीआरएस, शिवसेना ठाकरे गट, वंचित बहुजन आघाडी व संभाजी ब्रिगेड यांचा तिसरा पॅनेल, असे तीन पॅनेल निवडणुकीत आमनेसामने होते. ही निवडणूक सुरुवातीला तिरंगी होईल असे चित्र होते.

नंतर मात्र खासदार चिखलीकर व आमदार शिंदे या दाजी-भाऊजी प्रणित पॅनेलमध्ये ही निवडणूक झाली. यात चिखलीकर समर्थकांनी बाजी मारली. शेकाप- काँग्रेस प्रणित आमदार श्यामसुंदर शिंदे यांच्या शेतकरी विकास पॅनेलला सात तर बीआरएस प्रणित तिसऱ्या पॅनेलला एक जागेवर विजय मिळविता आला.

विजयी उमेदवारांची नावे पुढील प्रमाणे : सेवा सहकारी संस्था सर्वसाधारण मतदारसंघात भाजप समर्थक उमेदवार शाहूराज गोरे, शंकर पाटील, व्यंकटी पांढरे, कांशीराम वरपडे, शेकाप व काँग्रेस समर्थक गट- रोहित शिंदे, रमाकांत जोगदंड, ज्ञानेश्वर चोंडे, सेवा सहकारी संस्था महिला- शेकाप- काँग्रेस गटातील विजयी- पुष्पाताई खुडे, जनाबाई नाकाडे, सेवा सहकारी

इतर मागासवर्गीय गटातील भाजप समर्थक सुभाष देशमुख, सेवा सहकारी भटक्या जाती बालाजी झुंबाड, व्यापारी मतदारसंघ भाजप समर्थक शैलेश बोरलेपवार, शेकाप-काँग्रेस समर्थक गिरीश मामडे, ग्रामपंचायत मतदारसंघात भाजप समर्थक सुधाकर कौसल्ये, शेकाप-काँग्रेस समर्थक चंद्रकांत पेठकर, ग्रामपंचायत आर्थिक दुर्बल मतदारसंघात भाजप समर्थक मारोती पंढरे, ग्रामपंचायत अनु.जाती मतदारसंघात भाजप समर्थक नारायण गायकवाड, हमाल मतदारसंघात बीआरएस समर्थक भागवत कांबळे हे १८ जण विजयी झाले आहेत.