Police Patil Recruitment : पोलिस पाटील पदासाठी अर्ज भरताय? आज शेवटची तारीख

नांदेड : जिल्हा प्रशासनाच्या वतीने जिल्ह्यातील १६ तालुक्यातील ७८५ पोलिस पाटील पदांसाठी भरती प्रक्रिया सुरू करण्यात आली आहे. या भरतीसाठी इच्छुकांना ऑनलाईन अर्ज करण्याची सोमवारी (ता.८ जानेवारी) शेवटची मुदत आहे.या पदासाठी १४ जानेवारी रोजी नांदेड येथे लेखी परीक्षा होणार आहे.

जिल्ह्यातील आठ उपविभागांतर्गत कार्यरत १६ तालुक्यातील पोलिस पाटील पदाची भरती करण्यासाठी १ जानेवारी रोजी जिल्हाधिकारी कार्यालयाने https://nanded.gov.in आणि https://nanded.applygov.net या संकेतस्थळावर जाहिरात प्रसिद्ध केली आहे. त्यानुसार १ ते ८ जानेवारी या कालावधीत ऑनलाईन अर्ज स्विकारले जाणार आहेत.

मंगळवारी (ता.९ जानेवारी) पात्र, अपात्र उमेदवारांची यादी प्रसिद्ध करण्यात येणार आहे. बुधवारी (ता. १०) ते शनिवारी (ता. १३ जानेवारी) या कालावधीत उमेदवारांना प्रवेशपत्र ऑनलाईन डाऊनलोड करून घ्यावे लागणार आहे. या पदासाठी १४ जानेवारी रोजी लेखी परीक्षा नांदेड येथे होणार आहे.

या परीक्षेत प्रत्येक प्रश्नास एक या प्रमाणे ८० गुणांची परीक्षा असणार आहे. परीक्षेचा अवधी दोन तासांचा असेल. १४ जानेवारी सायंकाळी ८ वाजेपर्यंत उत्तरपत्रिकेबाबत जिल्हाधिकारी कार्यालयाचा nandedrdc@gmail.com या ई-मेलवर आक्षेप सादर करता येतील. तर १५ जानेवारी रोजी मुलाखतीस पात्र उमेदवारांची यादी प्रसिद्ध करण्यात येईल, अशी माहिती निवासी उपजिल्हाधिकारी महेश वडदकर यांनी पत्रकाद्वारे दिली आहे.

उपविभागनिहाय पदांची संख्या

• नांदेड उपविभाग -८८

• भोकर उपविभाग -८२

• कंधार उपविभाग -१७०

• हदगाव उपविभाग -१०१

• देगलूर उपविभाग -१४३

• धर्माबाद उपविभाग -६४

• बिलोली उपविभाग -९७

• किनवट उपविभाग -४०

• एकूण पदसंख्या -७८५