नांदेड जिल्ह्यातील डॉ. शंकरराव चव्हाण शासकीय महाविद्यालय आणि रुग्णालयात २४ तासांत तब्बल २४ जणांचा मृत्यू झाल्याचा धक्कादायक प्रकार समोर आला आहे. यानंतर राज्यभरातून संताप व्यक्त केला जात असून राज्यातील सार्वजनिक आरोग्य व्यवस्थेचा मुद्दा ऐरणीवर आला आहे. यामुळे राजकीय वातवरण तापताना दिसत आहे. राष्ट्रवादी काँग्रसचे नेते शरद पवार, सुप्रिया सुळे यांनी या घटनेनंतर गंभीर आरोप केले आहेत.
दोन महिन्यापूर्वी ठाण्यातील महापालिकेच्या कळवा रुग्णालयात एकाच रात्री १८ जणांचा मृत्यू झालेली घटना गांभिर्याने घेतली नसल्याने या अत्यंत गंभीर घटनेचे पुनरावृत्ती झाल्याचे शरद पवार म्हणाले आहेत. तसेच ये सरकारी यंत्रणांचे अपयश असल्याचे देखील पवार म्हणाले आहेत.
"नांदेड येथील शासकीय रुग्णालयात २४ तासात १२ नवजात बालकांसह २४ जणांचा मृत्यू होण्याची दुर्दैवी घटना ही अक्षरशः मन हेलावून टाकणारी आहे. दोनच महिन्यांपूर्वी ठाण्यातील महानगरपालिकेच्या कळवा रुग्णालयात एकाच रात्रीत १८ जणांचा मृत्यू झाल्याची दुर्दैवी घटना घडली होती. मात्र या घटनेला गांभीर्याने न घेतल्यानेच नांदेड येथील शासकीय रुग्णालयात अशाप्रकारच्या एका अत्यंत गंभीर घटनेची पुनरावृत्ती झाली. यातून सरकारी यंत्रणांचे अपयश स्पष्ट होते. किमान वेळीच या दुर्दैवी घटनांचे गांभीर्य लक्षात घेऊन या घटनांची पुनरावृत्ती होणार नाही आणि निष्पाप रुग्णांचा जीव वाचला जाईल यासाठी ठोस पावले उचलली जावीत याकडे राज्य सरकारने लक्ष देणे आवश्यक आहे." अशी पोस्ट शरद पवार यांनी सोशल मीडिया प्लॅटफॉर्म ‘एक्स’ (ट्विटर)वर केली आहे.
सुप्रिया सुळे काय म्हणाल्या...
राष्ट्रवादी काँग्रेसच्या खासदार सुप्रिया सुळे यांनी देखील या गंभीर घटनेनंतर प्रतिक्रिया दिली आहे. असंवेदनशील सरकारचा 'आपलं बोलून मोकळं व्हायचं' हा दृष्टिकोन राज्याच्या हिताचा नाही. तसेच मुख्यमंत्र्यांनी या घटनांची गांभीर्याने दखल घेऊन तातडीने संबंधित मंत्र्यांचा राजीनामा घेतलाच पाहिजे अशी मागणी देखील सुप्रिया सुळे म्हणाल्या आहेत.
"असंवेदनशील सरकारचा 'आपलं बोलून मोकळं व्हायचं' हा दृष्टिकोन राज्याच्या हिताचा नाही. राज्यातील आरोग्यव्यवस्थेचा अक्षरशः बोजवारा उडाला आहे. ठाण्यातील रुग्णालयात १८ रुग्णांचा एका दिवसात मृत्यू झाल्यानंतर आता विष्णुपुरी, नांदेड येथे एकाच दिवसात २४ जण दगावले आहेत. औषधे वेळेवर न मिळाल्याने किंवा उपलब्धच नसल्याने हे मृत्यू झाले असल्याचे पिडितांचे नातेवाईक सांगतात."
"रूग्णालयात औषधांचा मुबलक साठा असावा. श्वानदंश तथा सर्पदंशावरील औषधे उपलब्ध असावी अशी मागणी मी वारंवार केली आहे. तरीही राज्यातील बहुतेक शासकीय रुग्णालयांत औषधांचा तुटवडा असल्याचे आणि डॉक्टर्स उपलब्ध नसल्याचे माध्यमातून आलेल्या बातम्यांतून तसेच नागरीकांच्या तक्रारीवरुन दिसते. याचा अर्थ राज्यकर्त्यांचे नागरीकांच्या मुलभूत सुविधांकडे लक्ष नाही."
"नागरीकांच्या किमान हितासाठी त्यांनी काम करणे आवश्यक आहे. एका दिवसात एवढ्या मोठ्या प्रमाणात होणारे मृत्यूमुळे या सरकारला वेदना होत नसतील तर हि बेसिकातच गफलत म्हणावी लागेल.ठ
"मुख्यमंत्र्यांनी या घटनांची गांभीर्याने दखल घेऊन तातडीने संबंधित मंत्र्यांचा राजीनामा घेतलाच पाहिजे. या घटनांची निवृत्त न्यायमूर्तींच्या देखरेखीखाली चौकशी व्हायला हवी. कारण राज्यकर्त्यांना निवडून देणाऱ्या मायबाप जनतेचे जीव एवढे स्वस्त नक्कीच नाहीत." अशी मागणी देखील सुप्रिया सुळे म्हणाल्या आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
