दीर्घ प्रतिक्षेनंतर नांदेड जिल्ह्यात पाऊस; पेरण्यांना सुरवात : सरासरी १९. ४ मिलिमीटर

नांदेड : जिल्ह्यात मागील दहा ते पंधरा दिवसापासून पावसाने पाठ फिरविल्यामुळे खरिप पेरण्या खोळंबल्या होत्या. पावसाअभावी पिकांची वाढ खुंटली होती. काही भागात दुबार पेरणींचे संकट असतांना रविवारी (ता. २७) जिल्ह्यातील अनेक भागात समाधानकारक पाऊस झाला. सोमवारी (ता. २८) सकाळी साडेदहा पर्यंत जिल्ह्यात सरासरी १९.४ मिलिमीटर पावसाची नोंद झाली आहे.

या पावसामुळे रखडलेल्या पेरणींची कामांना पुन्हा प्रारंभ झाला आहे. जिल्ह्यामध्ये जून महिन्यात प्रारंभापासून पावसाचे प्रमाण चांगले होते. यामुळे शेतकर्‍यांनी जूनच्या दुसर्‍या आठवड्यात पेरण्यांना प्रारंभ केला होता. परंतु यानंतर पावसाने पाठ फिरविल्यामुळे शेतकर्‍यांसमोर दुबार पेरणींचे संकट ओढवले होते. यंदा सोयाबीन बियाणांची टंचाई असल्यामुळे शेतकर्‍यांना अधीकचे पेसे देवून बियाणे खरेदी करावे लागले. अशातच पावसाने ओढ दिल्यामुळे शेतकर्‍यांच्या नजरा आकाशाकडे लागल्या होत्या.

हेही वाचा - नाशिक पोलीसांनी गुन्हेगारांना सुधारण्याची संधी दिली आणि गुन्हेगारांसाठी ती एक मोठी पर्वणीच ठरली...

दरम्यान रविवारी (ता. २७) दुपारनंतर जिल्ह्यात अनेक ठिकाणी पावसाला सुरवात झाली. हा पाऊस मुदखेड, धर्माबाद, भोकर, बिलोली, उमरी, हदगाव तालुक्यात अधीक होता. तर इतर सर्व तालुक्यातही पावसाची नोंद झाली. जिल्ह्याच्या सर्वच भागात होत असल्याने रखडलेल्या पेरण्यासांठी शेतकरी सरसावले आहेत.

मंडळनिहाय पाऊस

नांदेड शहर मंडळात ३७, बिलोली ३५, आदमपूर व लोहगाव प्रत्येकी ३५, कुंडलवाडी ५०, कंधार ४०, हदगाव ३५, मोघाळी २८, देगलूर ३५, खानापूर व माळेगाव प्रत्येकी ३४, इस्लापूर ४२, उमरी ३५, अर्धापूर २८, शहापूर ३७. नरसी ३२ मिलीमीटर पावसाची नोंद झाली.

येथे क्लिक करा - रेल्वेमंत्री पीयूष गोयल यांनी दखल घेत आपल्या ट्विटर हँडलवर संबंधितांच्या कामाचे कौतुकही केले...तरीही लोहमार्गाचा प्रश्न रेंगाळला

तालुकानिहाय झालेला सरासरी पाऊस

(मिलीमीटरमध्ये)

नांदेड १६.३, बिलोली ३५, मुखेड १२.५, कंधार १०.६, लोहा ९.६, हदगाव २१.४, भोकर २३.६, देगलूर ३४.२, किनवट २४.७, मुदखेड ६, हिमायतनगर १२.७, माहूर ६, धर्माबाद २५, उमरी २३.७, अर्धापूर २१.८, नायगाव २५.