नांदेड : पुढील आठवड्यापासून 'एसटी' प्रवास सुरळीत होणार

नांदेड : मागील दोन महिण्यापेक्षा अधिक काळापासून एसटी (ST) कर्मचाऱ्यांचे विलीनीकरणाच्या मुद्द्यावरुन कामबंद आंदोलन (Protest)सुरु आहे. त्यामुळे एसटीच्या प्रवासी वाहतुकीवर आणि मिळकतीवर त्याचा परिणाम झाला आहे. त्यातुन बाहेर पडण्यासाठी वरिष्ठ स्तरावर युक्त्या लढवल्या जात आहेत. त्यास हळूहळू यश येताना दिसत आहे. नांदेड आगारातील(Nanded depot) पाच ते सहा कर्मचारी कामावर परतले आहेत. त्यामुळे दिवसाला पाच बसेस धावत आहेत.

सध्या नांदेड आगारातील तीन वाहक एक चालक यांच्यासह इतर आगारातील चार वाहक आणि चार चालक नांदेड एसटी आगाराच्या मदतीला धावून आले आहेत. त्यामुळे आज मंगळवारी (ता.१८) पासून मध्यवर्ती बसस्थानकातून बाहेर पडणाऱ्या एसटी बसेसच्या संख्येत वाढ होणार असून, यापूर्वी वाहन परिक्षक म्हणून कार्यरत असलेला एक व एक चालक कर्तव्यावर हजर होणार आहे. त्यामुळे सध्या होत असलेल्या १० फेऱ्या वाढवून मुख्य आगारातुन धावणाऱ्या बसेसच्या दिवसाच्या फेऱ्यांची संख्या दुपटीने वाढेल अशी शक्यता वर्तविली जात आहे.

दुसरीकडे आगारातील कर्मचाऱ्यांच्या कामाच्या ठिकाणात फेर बदल करण्यात आले असून, सोमवारी आगारातील सहा कर्मचाऱ्यांच्या बदल्यांची प्रक्रियापूर्ण झाली असून, त्यांच्या बदल्यांची आॅर्डर मंगळवारी (ता.१८) त्यांच्या हातात देण्यात येणार असल्याचे सांगण्यात आले आहे. त्यामुळे कामगारांची संख्या वाढण्यासोबत बसस्थानकातून बाहेर पडणाऱ्या बसेसच्या संख्येतही वाढ होणार आहे.(Nanded News)