नांदेड जिल्ह्यात दोन शेतकऱ्यांची गळफास घेऊन आत्महत्या

उमरी/ मारतळा (जि.नांदेड) : नापिकी, कर्जफेडीच्या विवंचनेतून दोन शेतकऱ्यांनी आत्महत्या केल्याची घटना नांदेड जिल्ह्यात (Farmers Suicide In Nanded) घडल्या. धनंज (बुद्रुक, ता. लोहा) येथील माधव गोविंदराव शिंदे (वय ३२) या शेतकऱ्याने विहीरीवर पाणी शेंदण्याच्या चरकाला गुरुवारी (ता.पाच) सकाळी गळफास घेऊन आत्महत्या (Nanded) केली. त्यांची सात एकर कोरडवाहू शेती असून बॅंकेचे कर्ज होते. नापिकी, अतिवृष्टीमुळे शेतीचे (Farmer) नुकसान झाल्याने कर्जफेडीच्या विवंचनेत ते होते, असे नातेवाईकांनी सांगितले. त्यांच्या मागे आई, पत्नी, लहान दोन मुली, मुलगा असा परिवार आहे. उस्माननगर पोलिस ठाण्यात घटनेची नोंद झाली.

नापिकी, कर्जाच्या विवंचनेतून भायेगाव (ता. उमरी, जि. नांदेड) येथील शेतकरी माधव चांदू वाघमारे (३५) यांनी बुधवारी (ता. चार) सकाळी शेतातील झाडाला गळफास घेऊन आत्महत्या केली. उमरी पोलिसांनी पंचनामा केला. वाघमारे यांच्या मागे आई, दोन भाऊ, दोन बहिणी, पत्नी, दोन मुले असा परिवार आहे. या कुटुंबाला शासनाकडून मदत मिळवून द्यावी, अशी मागणी वंचित बहुजन आघाडीच्या करुणाताई खंडेलोटे यांनी तहसीलदार माधवराव बोथीकर यांच्याकडे निवेदनाद्वारे केली आहे.