नांदेड जिल्ह्यातील दोन शेतकऱ्यांचा मृत्यू 

नांदेड : जिल्ह्यात दोन वेगवेगळया घटनामंध्ये दोघांचा मृत्यू झाला. यात एका घटनेत कर्जबाजारी शेतकरी आत्महत्या तर दुसऱ्या घटनेत विज पडून शेतकऱ्यांचा मृत्यू. या दोन्ही घटना रविवारी (ता. १४) सायंकाळच्या सुमारास घडल्या. या प्रकरणी किनवट व हिमायतनगर ठाण्यात आकस्मिक मृत्यूची नोंद करण्यात आली. 

पोलिस सुत्रांकडून मिळालेली माहिती अशी की, किनवट तालुक्यातील मलकवाडी येथील शेतकरी लक्ष्मण हुलाजी गेडाम (वय ४०) यांच्या शेतात मागील काही वर्षापासून सतत नापिकी होत होती. तरीसुध्दा हिंम्मत न हारता ते दरवर्षी आपल्या शेतात पेरणी करत. मात्र सतत लहरी निसर्गाचा फटका त्यांना बसत आला. कधी अवर्षण तर कधी ओला दुष्काळ यामुळे ते खचुन गेले. घरगाडा चालविण्यासाठी त्यांनी कर्ज काढले. 

हेही वाचा - अक्षदा पडण्याअगोदर नवदाम्पत्यानी याला दिले महत्व

कर्जबाजारी शेतकऱ्याची आत्महत्या

मात्र शेतातील उत्पन्न घटल्याने कर्जाची परतफेड वेळेत करु शकत नव्हते. त्यामुळे कर्जाचा डोंगर वाढत गेला. सततची नापिकी, कर्जबाजारीपणा या दुहेरी संकटात सापडलेल्या लक्ष्मण गेडाम यांनी अखेर आत्महत्या करण्याचा निर्णय घेतला. शेवटी रविवारी (ता. १४) सकाळी आठ वाजता गळफास घेऊन आत्महत्या केली. या घटनेची माहिती चंदु उत्तमराव गायकवाड यांच्या माहितीवरुन किनवट पोलिस ठाण्यात आकस्मिक मृत्यूची नोंद करण्यात आली आहे. तपास पोलिस नाईक संदुपटलेवार करत आहेत.

येथे क्लिक करा -  स्वराज्य संस्थापिका : राष्ट्रमाता जिजाऊ
 
हिमायतनगर पोलिस ठाण्यात नोंद

तर दुसऱ्या घटनेत शेतात काम करणाऱ्या सुभाष दिगंबर तुंडेकर (वय ४२) यांच्या अंगावर रविवारी (ता. १४) विज पडून त्यांचा मृत्यू झाला. ते सरसम बु. (ता. हिमायतनगर) शिवारात ते शेतात मशागत करु लागले. रविवारी अचानक सायंकाळच्या सुमारास ढग भरुन आले आणि विजाच्या कडकडाटासह पाऊस सुरू झाला. बचावासाठी सुभाष तुंडेकर यांनी शेतातील बाभळीच्या झाडाचा आधार घेतला. मात्र त्याच्या अंगावर विज पडून त्यांचा मृत्यू झाला. याप्रकरणी विजयकुमार देशमुख यांच्या माहितीवरुन आकस्मिक मृत्यूची नोंद करण्यात आली आहे. तपास पोलिस हवालदार श्री. ठाकरे करत आहेत.