बैलगाडी उलटली, पुराच्या पाण्यात दोन सख्ख्या जावा गेल्या वाहून

नांदेड - लोहा (Loha) तालुक्यातील नसरत सावरगाव येथे सोमवारी (ता.३०) दुपारी दोन वाजेच्या सुमारास अचानक ढगफुटीसारखा पाऊस झाला. या वेळी गावाजवळ असलेल्या नदीला पूर आला. या वेळी पुराच्या पाण्यातून (Nanded) मार्ग काढताना बैलगाडी उलटली असून यात दोन सख्ख्या जावा वाहून गेल्याची घटना घडली. मणकर्णाबाई बापुराव दगडगाव (वय ५२) व पार्वतीबाई संभाजी दगडगावे (वय ४५) अशी मृतांची नावे आहेत. लोहा तालुक्यातील नसरत सावरगाव येथील शेतकरी अमोल दगडगावे हे आपल्या शेतात (Rain) काम करण्यासाठी गेले होते. पावसाचे पाणी वाढल्यामुळे ते आपल्या बैलगाडीसह घराकडे येत होते. रस्त्यावर नदी आहे. नदी ओलांडून येताना अचानक नदीला पुराच्या (Flood) पाण्याचा लोट आला. पुराचा लोट आल्यामुळे बैलगाडी उलटी होऊन वाहून गेली.

गाडीमध्ये अमोल दगडगावे, भाऊ विवेक दगडगावे, पत्नी शिवमाला अमोल दगडगावे, आई मणकर्णाबाई बापुराव दगडगावे, चुलती पार्वतीबाई संभाजी दगडगावे हे पाच जण होते. त्यातील मणकर्णाबाई बापुराव दगडगावे (वय ५२) यांचा हुलेवाडी येथील पुलाजवळ तर पार्वतीबाई संभाजी दगडगावे (वय ४५) यांचा परभणी जिल्ह्यातील पेंडू (ता.पालम) येथे मृतदेह सापडला. या दोन्ही महिला सख्ख्या जावा आहेत. या वेळी अमोल दगडगावे, विवेक दगडगावे, शिवमाला दगडगावे यांनी झाडाच्या फांदीला धरुन आपला जिव वाचवण्यात यशस्वी झाले. तसेच बैल जोडीही वाहून गेली असून त्यांचा शोध उशिरापर्यंत सुरु होता. शवविच्छेदनासाठी मृतदेह लोहा ग्रामीण रुग्णालय येथे पाठवण्यात आले आहेत.