नांदेड : अस्वच्छतेमुळे धर्माबादकरांचा कोंडतोय श्वास

धर्माबाद : शहरातील नगरपालिकेच्या वतीने ‘स्वच्छ भारत’ अभियानाची जाहिरात अनेक मुख्य ठिकाणी फलकावर करण्यात आली आहे. या जाहिरातीकडे पाहिल्यानंतर शहर किती सुंदर असेल असा प्रश्न पडतो. मात्र प्रत्यक्षात शहरात सर्वत्र घाणीचे साम्राज्य पसरलेले आहे. नगरपालिकेचे घनकचरा व्यवस्थापनाचे मागील काळात दिलेले टेंडरचा कालावधी दोन महिन्यांपूर्वी संपलेला आहे. त्यामुळे शहरातील घनकचरा व्यवस्थापन साफसफाई योग्य पद्धतीने केल्या जात नाही. त्यामुळे शहरातील गल्लीबोळात कचऱ्याचे ढिगारे पडून आहेत. कचरा नियमित उचलला जात नसल्याने धर्माबादकरांचा श्वास कोंडत असून स्वच्छ, सुंदर शहराच्या स्वप्नांचा चुराडा होत आहे.

धर्माबाद नगरपालिकेत प्रशासक म्हणून उपविभागीय अधिकारी राजेंद्र शेळके यांची नियुक्ती करण्यात आल्यानंतर धर्माबादकरांना अनेक समस्यांना तोंड द्यावे लागत आहे. धर्माबाद नगरपालिकेचे घनकचरा व्यवस्थापनाचे मागील काळात दिलेले टेंडरचा कालावधी संपलेला आहे. त्यामुळे धर्माबाद शहरातील घनकचरा व्यवस्थापन साफसफाई योग्य पद्धतीने केल्या जात नाही. शहर प्रभागातील कचरा घेऊन जाणाऱ्या नगरपालिकेच्या घंटागाड्या गल्लीबोळात दररोज दारोदारी फिरकत नसल्याने कचरा कुठे टाकावा हा प्रश्न नागरिकांसमोर उभा राहिला आहे. त्यामुळे नागरिक कचरा नाल्यात फेकून देत असल्याने नाल्या कचऱ्याने भरल्या असून तुंबल्या आहेत.

नगरपालिका प्रशासनाचा कारभार ढिसाळ झाल्याने शहरातील अस्वच्छता वाढली आहे. नाल्यातील गाळ काढला नसल्याने नाल्यातील पाणी रस्त्यावर येऊन दुर्गंधी सुटत आहे. त्यामुळे नागरिकांचे आरोग्य धोक्यात आले आहे. याकडे मुख्याधिकारी दुर्लक्ष करीत असल्याचे दिसून येत आहे. नगरपालिका घनकचरा व्यवस्थापन टेंडर संपून जवळपास दोन ते तीन महिन्याचा कालावधी होत आलेला आहे. परंतु अद्याप धर्माबाद नगरपालिकेने घनकचरा व्यवस्थापनाची नवीन टेंडर काढून योग्य ती कार्यवाही न केल्यामुळे शहरात घनकचरा व्यवस्थापनाचा प्रश्न निर्माण झालेला आहे. त्यामुळे घनकचरा व्यवस्थापनाचे नवीन टेंडर चालू करणे अत्यंत आवश्यक आहे. तरी धर्माबाद नगरपालिकेतील घनकचरा व्यवस्थापनाचे टेंडर तात्काळ नव्याने भरून शहरात वाढणारी दुर्गंधी दूर करण्यात यावी, अशी मागणी शिवसेनेचे शहर प्रमुख अनिल कमलाकर यांनी उपविभागीय अधिकारी राजेंद्र शेळके यांच्याकडे एका निवेदनाद्वारे केली आहे.