छळामुळे पेटवून घेतलेल्या विवाहितेच मृत्यू

गारगोटी : बेगवडे (ता. भुदरगड) येथील सौ. अश्विनी अरविंद गुरव (वय २७) हिने मानसिक व शारीरिक त्रासाला कंटाळून स्वत:ला पेटवून घेतले होते. उपचारांदरम्यान तिचा मृत्यू झाला. या प्रकरणी पती अरविंद मारुती गुरव व सासू लक्ष्मी मारुती गुरव (रा. बेगवडे) यांच्यावर भुदरगड पोलिसांत गुन्हा दाखल झाला.

याबाबतची फिर्याद जयश्री किशोर गुरव (रा. सांगली) यांनी दिली. पोलिसांनी सांगितले, की बेगवडे येथे अश्विनी गुरव हिचा पती अरविंद गुरव व सासू लक्ष्मी गुरव हे दोघे तिला घरातील काम लगेच करीत नाही, वेळ लावते, तसेच पुण्यात फ्लॅट घेण्यासाठी माहेरून दोन लाख रुपये आणण्यासाठी शारीरिक व मानसिक छळ करीत होते. त्यांच्या शारीरिक व मानसिक छळास कंटाळून अश्विनीने २२ नोव्हेंबरला पहाटे स्वतःहून अंगावर रॉकेल ओतून घेऊन घराजवळील शौचालयात पेटवून घेतले. यानंतर तिला ‘सीपीआर’मध्ये उपचारांसाठी दाखल केले होते. २३ नोव्हेंबरला तिचा मृत्यू झाला. या प्रकरणी पती व सासूविरोधात तक्रार दाखल झाली आहे. पोलिस निरीक्षक श्रीकांत कंकाळ तपास करीत आहेत.

संपादन - धनाजी सुर्वे