जिंती (सोलापूर) : टाकळी (ता. करमाळा) शिवारात काल पहाटे बिबट्याने लोचिराम करचे यांच्या गोठ्यातील शेळीवर हल्ला करून शेळी फस्त केली. वनविभाग मात्र सुस्तच आहे. गेल्या पंधरा दिवसांपासून या भागात बिबट्याचा वावर आहे. पिंजरा लावण्यासाठी कात्रज येथील शेतकऱ्यांनी मागणी केली होती, परंतु शेतकऱ्यांच्या तक्रारीला वनविभागाने केराची टोपली दाखवली आहे. काल दुसरी शेळी खाल्ल्यामुळे शेतकरी भयभीत झाला आहे.
बिबट्याच्या भीतीने शेतीची कामे बंद झाली आहेत. कात्रज (ता. करमाळा) येथील शिवारात 5 ऑगस्ट रोजी सायंकाळी साडेचार वाजण्याच्या सुमारास बिबट्यासदृश प्राण्याने एक शेळी फस्त केली होती. त्यानंतर वनविभागाच्या अधिकाऱ्यांनी शेळी खाल्लेल्या जागेचा पंचनामा केला. तसेच त्या जागेवरील पायांच्या ठशांचे फोटो घेतले होते. या ठशांचा अहवाल बुधवारी (ता. 12) आला होता. त्या अहवालामध्ये संबंधित ठसे हे बिबट्याचेच आहेत, अशी माहिती मोहोळचे वनपाल डी. डी. साळुंखे यांनी दिली होती. तरी देखील वनखात्याने पिंजरा लावण्यासाठी उपाययोजना केलेली नाही. हा भाग उजनी परिसरातील असून या परिसरातील नागरिक हे शेतामध्ये राहण्यासाठी गेले आहेत. त्यामुळे या बिबट्यापासून शेतकऱ्यांना व त्यांच्या पाळीव प्राण्यांना धोका निर्माण झालेला आहे.
याबाबत टाकळीचे माजी सरपंच गोरख गुळवे म्हणाले, करमाळा तालुक्‍यातील पश्‍चिम भागात टाकळी, कात्रज, कोंढार चिंचोली परिसरात बिबट्याचे ठसे आढळून आले आहेत. कात्रज व काल टाकळी येथील स्थानिक रहिवासी लोचीराम कर्चे यांच्या शेतातील गोठ्यातील शेळी बिबट्याने फस्त केली आहे. यासंदर्भात मी करमाळा तालुक्‍याचे आमदार संजय शिंदे यांच्याशी फोनवरून संपर्क करून घटनेची माहिती दिलेली आहे. त्याप्रमाणे आमदार शिंदे यांनी वन विभागाच्या अधिकाऱ्यांना पिंजरा लावण्यासाठी सूचना दिल्या आहेत.
संपादन : श्रीनिवास दुध्याल
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.