"और हड्डी गले में फंस गई'प्रकरणी बोकडाच्या जेवणाच्या आयोजकासह "हात धुतलेल्यां'विरुद्धही गुन्हा दाखल !

पंढरपूर (सोलापूर) : बोकाडाच्या जेवणा प्रकरणी अखेर आयोजक शिवाजी बळिराम भोसले, त्याचा जेलमध्ये असलेला भाऊ तानाजी याच्यासह मंगळवेढा येथील पोलिस बजरंग माने आणि उदय ढोणे यांच्या विरोधात तलाठ्यींनी दिलेल्या फिर्यादीवरून पोलिसांनी गुन्हा दाखल केला आहे. काल (गुरुवारी) या प्रकरणातील दोन्ही पोलिसांना निलंबित करण्यात आले आहे. एवढेच नव्हे तर बोकडाच्या जेवणात हात धुतलेल्या 30 ते 40 गावकऱ्यांविरुद्धही गुन्हा दाखल झाल्याने मंगळवेढा व पंढरपूर शहर-तालुक्‍यात खळबळ उडाली आहे. 

हेही वाचा : और हड्डी गले में फंस गई..! बोकडाच्या जेवणामुळे उघडकीस आली कैदी, पोलिस, गावकरी आणि कोरोनाची धक्कादायक कहाणी 

पंढरपूर तालुक्‍यातील आंबे गावात 17 जुलै रोजी आरोपी शिवाजी बळिराम भोसले याने शासकीय आदेशाचे उल्लंघन करून साथीच्या रोगाचा फैलाव होईल याची कल्पना असतानासुद्धा जाणीवपूर्वक बोकड कापून जेवणाचा कार्यक्रम ठेवला. त्या जेवणाच्या कार्यक्रमाला गावातील सुमारे 30 ते 40 लोक उपस्थित राहिले. त्याचप्रमाणे मंगळवेढा येथील सब जेलमधील खुनाच्या आरोपाखाली अटकेत असलेला कैदी तानाजी बळिराम भोसले याच्यासह मंगळवेढा पोलिस ठाण्याचे पोलिस उदय ढोणे आणि बजरंग माने यांनाही जेवणासाठी बोलावले होते. गावामध्ये साथीचे रोग फैलावतील अशी कृती केली, अशा आशयाची फिर्याद तलाठी प्रकाश गुजले यांनी पंढरपूर तालुका पोलिस ठाण्यात दाखल केली आहे. 

हेही वाचा : बोकडाची हड्डी भोवली..! नाट्यमय घडामोडींनंतर अखेर "त्या' दोन पोलिसांवर निलंबनाची कारवाई... 

या प्रकरणी बोकाडाचे जेवण ज्यांनी आयोजित केले होते ते शिवाजी भोसले, कैदी तानाजी भोसले, पोलिस बजरंग माने, उदय ढोणे तसेच गावातील 30 ते 40 लोकांच्या विरोधात पोलिसांनी आपत्ती व्यवस्थापन कायद्यासह अन्य काही कलमान्वये गुन्हा दाखल केला आहे. या प्रकरणी पंढरपूर तालुका पोलिस ठाण्याचे निरीक्षक किरण अवचर पुढील तपास करीत आहेत. काल (गुरुवारी) या प्रकरणातील दोन्ही पोलिसांना निलंबित करण्यात आले आहे. 

संपादन : श्रीनिवास दुध्याल