सुखद बातमी ! रेल्वे कर्मचाऱ्यांच्या पत्नींचा मदतीचा हात 

सोलापूर : रेल्वे प्रवाशांना स्वयंशिस्तीचे धडे देणाऱ्या तिकीट निरीक्षकांनी पत्नीच्या माध्यमातून रेल्वे कर्मचाऱ्यांसाठी मास्कचे शिवणकाम हाती घेतले आहे. रेल्वे प्रशासनाकडून मिळणाऱ्या कापडापासून हे मास्क तयार केले जात असून त्यासाठी कोणताही चार्ज घेतला जात नाही. लॉकडाउन काळात रेल्वे कर्मचारी सुरक्षितत रहावेत या हेतूने दररोज दोनशे मास्क शिवून दिले जात आहेत. 

हेही नक्‍की वाचा : मोठा निर्णय ! महाविद्यालयीन विद्यार्थ्यांच्या घरबसल्या ऑनलाइन परीक्षा 

काशिनाथ रेगल हे मागील 25 वर्षांपासून रेल्वे सेवेत कार्यरत आहेत. त्यांच्या पत्नीचे नागरत्न रेगल यांचे शिक्षण दहावीपर्यंतच झाले असून त्यांचा एक मुलगा विदेशी कंपनीत पुण्यात कामाला आहे. तर मुलगी फॅशन डिझाईन कोर्स करीत असूनही तीही या कामात मदत करीत आहे. घरची परिस्थिती उत्तम असतानाही त्यांनी मोफत मास्क शिवणकाम हाती घेतले असून मागील चार दिवसांत दोनशे मास्क तयार केले आहेत. दुसरीकडे नितेश उडाणशिव हेदेखील रेल्वेत तिकीट निरीक्षक म्हणून कार्यरत असून त्यांचा एक मुलगा दहावी तर दुसरा आठवीत शिकत आहे. त्यांच्या पत्नीचे दहावीपर्यंत शिक्षण झाले असून त्यांनीही रेल्वे कर्मचाऱ्यांसाठी मास्क शिलाईचे काम हाती घेतले आहे. त्यांनी आतापर्यंत दोनशेहून अधिक मास्क शिवले असून ते रेल्वे अधिकाऱ्यांकडे सुपूर्द केले आहेत. घरातील कामे उरकून रेल्वे अधिकाऱ्यांच्या पत्नींनी सामाजिक बांधिलकी जोपासली आहे. रियाज शेख यांनीही स्वत: मास्क शिलाईचे काम सुरु करीत रेल्वे प्रशासानाला सहकार्य करीत आहेत. 

हेही नक्‍की वाचा : अबब ! सोलापुरात 14 हजारांहून अधिक जणांविरुध्द गुन्हे 

मदतीचा एक हात देशहितासाठी 
कोरोनाचा प्रादुर्भाव रोखण्यासाठी केंद्र सरकारने देशभर लॉकडाउन जाहीर केला आहे. देशातील संपूर्ण प्रवासी रेल्वे वाहतूक बंदी ठेवली आहे. मध्य रेल्वेसह सेंट्रल रेल्वेमध्ये सुमारे सहा लाखांहून अधिक अधिकारी व कर्मचारी कार्यरत आहेत. रेल्वे अधिकारी व कर्मचारी कोरोनापासून दूर राहावेत या हेतूने रेल्वे अधिकाऱ्यांच्या पत्नींनी पुढकार घेतला आहे. सोलापूर विभागातील रेल्वे कर्मचारी व त्यांच्या पत्नींनी सामाजिक बांधिलकी जोपासत देशहितासाठी योगदान देत आहेत. वरिष्ठ वाणिज्य व्यवस्थापक प्रदिप हिरडे यांनी या कर्मचाऱ्याचे कौतूक केले आहे.