सोलापूरः महापालिकेने बॅंड व्यवसायासह केवळ पाच वादकांची अट घालून गुरुवारी (ता.1) रोजी परवानगी दिली आहे. या वादकांना केवळ हाताने वाजवता येणारे वाद्य वाजवता येतील.
महापालिकेने या बाबत आज आदेश काढले आहेत. मागील काही महिन्यापासून बॅंड व्यवसायाला परवानगी दिलेली नव्हती. या बाबत बॅंड व्यावसायिकांच्या वतीने मोठ्या प्रमाणात आंदोलन व मागणी करण्यात आली होती. त्यानंतर आज महापालिकेने त्या बाबत सविस्तर आदेश काढले.
सध्या शैक्षणिक, सांस्कृतिक, मनोरंजन, क्रिडा, राजकीय व धार्मिक कार्यक्रम, सभा व संमेलनांना परवानगी दिलेली नाही. त्यामुळे बॅंड व्यावसायिकांना फक्त लग्न समारंभात वाद्य वाजवण्याची परवानगी दिली आहे. बॅंड पथकातील एकूण पाच वादकांना सहभागी होता येईल. सकाळी नऊ ते रात्री नऊ या कालावधीत बॅंडवादन करता येणार आहे. वाद्ये वाजवताना सोशल डिस्टन्स ठेवणे बंधनकारक असणार आहे. वाद्ये वाजविणाऱ्या व्यक्तींनी फेस कव्हर, गॉगल्स, मास्क, रुमाल, हॅंडग्लोव्हज, सॅनिटायझर याचा वापर करणे आवश्‍यक असणार आहे.
बॅंड पथकाने वाद्ये वाजविण्यापुर्वी व नंतर ही सर्व वाद्ये सॅनिटाईझ करून घ्यावीत. बॅंड पथकाला केवळ हाताने वाजवता येणाऱ्या वाद्यासाठी परवानगी असणार आहे. तोंडाने वाजवता येणाऱ्या वाद्याला परवानगी असणार नाही. सर्व वादकांना सॅनिटायझरचा वापर व साबणाने सतत हात धुणे आवश्‍यक असणार आहे. वाद्य वाजवताना डोळे, नाक व चेहऱ्याला स्पर्श करणे टाळावे. सर्दी, ताप व श्‍वासोच्छवास किंवा कोविडचा त्रास असणाऱ्या बॅंडवादनात सहभागी होता येणार नाही. तसेच 65 वर्ष वयावरील वादकास बॅंड वादनाची परवानगी असणार नाही असे या आदेशात म्हटले आहे. या सोबत व्ही.डी.ओ.गेम व एमएससीआयटी प्रशिक्षणाला परवानगी दिली आहे.
संपादन ः प्रकाश सनपूरकर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.