वाळवा : आरोग्य केंद्राच्या इमारतीमध्ये पाणी गळती

वाळवा : जिल्ह्यात कामकाजात अग्रेसर असलेल्या येथील प्राथमिक आरोग्य केंद्राच्या मुख्य इमारतीच्या बऱ्याच भागाची पाणी गळतीने हानी झाली आहे. विशेष या आरोग्य केंद्रातील बहुतेक भागातील जमीन खचल्याने फरशांची मोठी नासधूस झाली आहे. आता मुख्य इमारतीच्या गच्चीवरून पाणी गळतीने बराच भाग ठिसूळ झाला आहे. त्यामुळे तोंडावर आलेल्या पावसाळ्याआधी इमारती दुरुस्तीचे काम होण्याची गरज आहे.

आरोग्य केंद्रातील प्रयोगशाळा, मुख्य लेखापाल कक्ष, जनरल वॉर्ड आणि अन्य ठिकाणी पाणी गळतीने मुख्य भिंती जीर्ण झाल्या आहेत. विशेष म्हणजे, आरोग्य केंद्रातील अंतर्गत भाग दुरून अतिशय देखणा दिसतो; प्रत्यक्षात ठिकठिकाणी पाणी मुरून बराच भाग पडझडीच्या मार्गावर आहे. आरोग्य केंद्रात मुख्य शस्त्रक्रिया विभागाजवळ व्हरांड्याच्या भिंतीला वीजपुरवठा करणारी मोठी प्रभावळ आहे. पाणी गळतीने हा भाग तर शेवाळला आहे. पावसाळ्यात सतत पाणी गळती राहिली तर तो

मोठा धोका निर्माण होऊ शकतो. मुख्य स्लॅबवरून पाणी गळतीने सगळी इमारत धोक्यात येणार आहे. इमारतीच्या छतावरील पाणी साठवण्यासाठी शिवकालीन पाणी साठवण योजना उभारण्यात आली, ज्यामुळे पावसाच्या पाण्याचा थेट जमिनीत निचरा होतो. मात्र या योजनेचा एकही थेंब प्रत्यक्ष जमिनीवर आला नाही. त्याउलट तो भिंतीतच पाझरला. आता त्या योजनेचे काही अवशेष बाकी आहेत.

या आरोग्य केंद्रात सामान्य रुग्णांवर मोठ्या प्रमाणात उपचार होतात. त्याशिवाय प्रसूती, प्रसूतिपश्चात शस्त्रक्रिया, आंतररूग्ण विभागात मोठ्या प्रमाणात रुग्ण दाखल होतात. या ठिकाणी रुग्णांना रात्रंदिवस सेवा उपलब्ध असते. प्रत्येक पातळीवर हे आरोग्य केंद्र आघाडीवर आहे. मात्र स्थानिक पदाधिकारी या आरोग्य केंद्राच्या समस्या सोडविण्यासाठी अपेक्षित प्रयत्न करत नाहीत.