Sangli Crime : घरी खेळत असताना चिमुरडी आरोपीच्या जवळ गेली अन् नराधमानं तिच्यावर..

सांगली : अल्पवयीन मुलीवर (Minor Girl) अत्याचार करणाऱ्या राजेबाकसर राजेसाब पिरजादे (वय ५९, जुना बुधगाव रोड, वाल्मिकी आवास योजना, सांगली) यास दोषी ठरवून वीस वर्षांची शिक्षा सुनावली. जिल्हा व अतिरिक्त सह सत्र न्यायाधीश (Court) डी. एस. हातरोटे यांनी ही शिक्षा सुनावली.

दंडाचे २५ हजार रुपये पीडित मुलीस देण्याचा आदेशही दिला. सरकार पक्षातर्फे जिल्हा सरकारी वकील आरती देशपांडे-साटविलकर यांनी काम पाहिले. खटल्याची हकीकत अशी, फिर्यादी यांच्या घरी आरोपी राजेबाकसर पिरजादे हा बऱ्याच वर्षांपासून सुतारकाम करीत होता. त्यांच्या घरी तो किरकोळ दुरुस्तीची कामे करीत होता. त्यामुळे फिर्यादी आणि आरोपीची चांगली ओळख होती.

कामाच्या निमित्ताने आरोपी पिरजादे याचे फिर्यादी यांच्या घरी वारंवार येणे-जाणे होते. १६ ऑक्टोबर २०१९ रोजी फिर्यादीच्या पतीने कामानिमित्त आरोपी पिरजादे यास घरी बोलावले. त्याला काम सांगून ते मुलाला आणण्यासाठी बाहेर गेले. त्यावेळी घरामध्ये फिर्यादी आणि सहावर्षीय मुलगी असे दोघेच होते. फिर्यादी स्वयंपाकघरात स्वयंपाक करीत होत्या.

आरोपी पिरजादे बाहेरच्या खोलीत काम करीत होता. पीडित मुलगी खोलीत चेंडूने खेळत होती. खेळताना आरोपीच्या जवळ पडलेला चेंडू आणण्यासाठी मुलगी गेली असता आरोपी पिरजादे याने तिच्यावर अत्याचार केला. ही घटना मुलीने आईला सांगितली. फिर्यादींनी पतीस तातडीने बोलवून घेतले व आरोपी पिरजादे यास पकडून पोलिसांच्या ताब्यात दिले.

याबाबत ‘पोक्सो’अंतर्गत (POCSO Act) गुन्हा दाखल झाला. हा खटला न्यायालयात सुनावणीस आला असता सरकार पक्षातर्फे सात साक्षीदार तपासण्यात आले. न्यायालयात आलेल्या साक्षी व पुरावे ग्राह्य धरून न्यायमूर्तींनी आरोपी राजेबाकसर पिरजादे यास वीस वर्षे कारावासाची शिक्षा ठोठावली. या प्रकरणाचा तपास सांगली शहर पोलिस (Sangli Police) ठाण्याचे निरीक्षक अजय सिंदकर यांनी केला. त्यांना पैरवी कक्षातील सीमा धनवडे, सुनीता आवळे, रेखा खोत, पी. जे. डांगे यांनी सहकार्य केले.