डॉ. आंबेडकरांच्या नावाची कमान पाडल्याप्रकरणी बाजू मांडण्यास सरपंच-सदस्यांना हवीये मुदत; सुनावणीवर आंबेडकरी समाजाचा बहिष्कार

सांगली : बेडग (ता. मिरज) येथील डॉ. बाबासाहेब आंबेडकर कमान प्रकरणी (Dr. Babasaheb Ambedkar Arch Case) मुख्य कार्यकारी अधिकारी तृप्ती धोडमिसे यांच्यासमोर कालपासून सुनावणी सुरू झाली. ग्रामपंचायत सरपंचांसह सदस्यांनी वकिलांमार्फत बाजू मांडण्यासाठी मुदत मागितली. तक्रारदार सुनावणीस गैरहजर राहीले.

बेडग (Bedag Miraj) येथील डॉ. आंबेडकर कमान उभारणीबाबत झालेल्या वादाबाबत विभागीय आयुक्तांकडून आलेल्या सूचनेनुसार मुख्य कार्यकारी अधिकारी तृप्ती धोडमीसे यांच्यासमोर कालपासून सुनावणी सुरू झाली. यापूर्वी १३ डिसेंबर रोजी होणारी सुनावणी पुढे ढकलण्यात आली होती. ती सुनावणी काल (मंगळवार) झाली. ग्रामपंचायत सरपंच, सदस्यांनी बाजू मांडण्यासाठी वकील दिले. मुदत देण्याची मागणी करण्यात आली.

आजच्या सुनावणीस दुसऱ्या गटाचे लोक आले नाहीत. आंबेडकरी समाजाच्यावतीने या सुनावणीवर बहिष्कार टाकल्याची माहिती सचिन कांबळे यांनी दिली. गतवेळची सुनावणी विकारण, अचानक रद्द केली. शिवाय ज्यांच्या समोर सुनावणी सुरू आहे, त्यांच्यावर आमचा विश्‍वास नाही. अन्य अधिकाऱ्यांसमोर सुनावणी घ्यावी, अशी मागणी त्यांनी केली. त्याबाबत काहीच निर्णय न घेतल्याने बहिष्कार टाकला असून मागणी मान्य झाल्याशिवाय सुनावणीस जाणार नाही, असेही त्यांनी स्पष्ट केले आहे.