बेळगाव-धारवाड रेल्वे मार्गासाठी ९२७ कोटी; शेतकऱ्यांचा मात्र विरोध

बेळगाव : बेळगाव ते व्हाया कित्तूर धारवाड नव्या रेल्वे मार्गाचे भूसंपादन राज्य सरकारने सुरु केले आहे. ९२७ कोटींचा हा प्रकल्प असून ७३ किलोमीटर लांबीचा मार्ग आहे. यासाठी कर्नाटक सरकार रेल्वेला मोफत जमीन देणार असून ५० टक्के प्रकल्पाची किंमत देखील देणार आहे. यामुळे या मार्गाला गती येणार आहे. मात्र, शेतकऱ्यांतून या मार्गाला विरोध होत असून याऐवजी दुसऱ्या मार्गाने रेल्वे मार्ग बनवा अशी मागणी केली जात आहे. यासाठी २१ मार्चला खासदारांच्या घरासमोर आंदोलन करण्याचा निर्णयही घेण्यात आला आहे.

बेळगावहून देसूर, नंदिहळ्ळी, प्रभुनगर, गर्लगुंजी, नागेरहाळ, बागेवाडी व्हाया कित्तूर ते धारवाड या मार्गे सध्या नियोजित रेल्वे मार्ग आहे. मात्र, या मार्गावर मोठ्या प्रमाणात सुपीक जमिन आहे. याचा मोठा फटका शेतकऱ्यांना बसणार आहे. यासाठी याच मार्गाच्या एक किलोमीटर आसपास असलेल्या व खडकाळ भागातून गेलेल्या जागेतून हा मार्ग बनवावा अशी मागणी शेतकऱ्यांतून जोर धरू लागली आहे. तसेच बिडी, खानापूर, नंदगड, बिडी, कित्तूर, धारवाड हा मार्ग देखील सोयीस्कर आहे. याचाही विचार करावा अशी मागणी शेतकऱ्यांतून करण्यात आली आहे.

हा मार्ग रद्द करावा यासाठी देसूर, नंदीहळ्ळी, गर्लगुंजी, राजहंसगड, नागेनट्टी, केकेकोप्प आदी भागातील ग्रामपंचायतीत ठराव केला आहे. तसेच दुसऱ्या मार्गाचा पर्याय सुचविला आहे. तसेच खासदार इराण्णा कडाडी, आमदार अभय पाटील, आमदार अनिल बेनके, आमदार लक्ष्मी हेब्बाळकर, संजय पाटील व सरकारला निवेदन दिले आहे. हा मार्ग झाल्यास अनेक शेतकऱ्यांच्या जमिनीची नासधूस होणार असल्याने हा मार्ग इतरत्र मार्गाने करावा अशी मागणी करण्यात आली आहे. यासंबंधी खासदारांच्या घरासमोर आंदोलन केले जाणार आहे.

नव्या रेल्वे मार्गाचे भुसंपादन सुरु केले आहे. ९२७ कोटींचा हा प्रकल्प आहे. कर्नाटक सरकार रेल्वेला मोफत जमीन देणार आहे. तसेच ५० टक्के प्रकल्पाची रक्कमही देणार आहे.

-अनिश हेगडे, जनसंपर्क अधिकारी, नैर्ऋत्य रेल्वे

सध्या केला जाणारा मार्ग पिकाऊ जमिनीतून जाणार आहे. यामुळे पर्यायी मार्ग शोधावा. आमचा विकासाला विरोध नाही. मात्र, पिकाऊ जमिनीतून जाणाऱ्या मार्गाला विरोध आहे. यासाठी २१ मार्चला खासदारांच्या घरासमोर आंदोलन करण्याचा विचार आहे.

-मारुती लोहार, माजी ता.पं. सदस्य