बेळगाव शहरासह ग्रामीण भागात आज जोरदार पावसाला सुरुवात झाली.

बेळगाव : बेळगाव शहरासह ग्रामीण भागात आज जोरदार पावसाला सुरुवात झाली. दुपारपर्यंत पावसाची संततधार कायम होती. मात्र, दुपारनंतर पाऊस गायब झाला. दिवसभर हवेत गारठा होता. पावसामुळे बाजारपेठेतील गर्दी काही वेळ कमी झाली होती. मात्र, पाऊस गेल्यानंतर पुन्हा गर्दी वाढली. जुलैच्या पाच दिवसांत सरासरी २१.७४ मिलिमीटर पावसाची नोंद झाली आहे.

मॉन्सूनला सुरुवात होऊन महिनाभरानंतर अखेर जोरदार पावसाला सुरुवात झाली आहे. मात्र, दुपारनंतर पावसाने उघडीप घेतली. गेल्या चार दिवसांपासून रिपरिप पावसाला सुरुवात झाली आहे. दोन दिवसांपासून पावसाने गती वाढविली आहे. कालही (ता. ४) कधी जोरात तर कधी संततधार पाऊस झाला. मंगळवारीही काही तास जोरात पाऊस तर काही वेळ रिपरिप पाऊस झाला. मात्र, दुपारी तीननंतर पाऊस पूर्णपणे गायब झाला. दिवसाच्या पहिल्या टप्प्यात का असेना पावसाला सुरुवात झाली असल्याने शेतकऱ्यांतून समाधान व्यक्त होत आहे. मात्र, अजूनही दमदार पावसाच्या प्रतीक्षेत शेतकरी आहे.

दरम्यान, १ जुलै रोजी १.७१ मिमी, २ जुलैला ३.३१ मिमी, ३ जुलैला १.४६ मिमी, ४ जुलै २.०६ मिमी तसेच ५ जुलैला १३.१९ मिमी पाऊस झाला. जुलै महिन्यात गेल्या पाच दिवसात सरासरी २१.७४ मिमी पावसाची नोंद झाली आहे. अथणीत ११.२ मिमी, बैलहोंगलमध्ये १०.४ मिमी, बेळगावमध्ये २७.१ मिमी, चिक्कोडीत ३१.०७ मिमी, गोकाकमध्ये ७.७ मिमी, हुक्केरीत १२.२ मिमी, कागवाडमध्ये २७.८ मिमी, खानापूरमध्ये ७१.१ मिमी, कित्तूरमध्ये २४.९ मिमी, मुडलगीत १०.१ मिमी, निपाणीत ४६.६ मिमी, रायबागमध्ये १.० मिमी, रामदुर्गमध्ये १३.०७ मिमी व सौंदत्तीत ८.६ मिमी पावसाची गेल्या पाच दिवसात नोंद झाली आहे.