गव्याच्या एंट्रीने सांगली मार्केट यार्डात जमावबंदीचे आदेश

सांगली : गेल्या तीन दिवसापासून सांगली (Sangli) वाडी परिसरात दिसणारा महाकाय गवा आज पहाटे शहराच्या दिशेने आला. आयर्विन पुल (Irwin Bridge) परिसरातून गणपती पेठ, वखारभाग, एसएफसी मॉल, सावली बेघर निवारा केंद्र त्यानंतर मार्केट यार्ड परिसरात गवा दिसून आला. मार्केट यार्ड परिसरातील वेअर हाऊस परिसरात पहाटे पाच वाजता गवा (Bison) दिसून आला असून, या ठिकाणी तात्काळ नाकाबंदी करण्यात आली आहे. तहसीलदार यांनी मार्केट यार्ड परिसरात जमावबंदीचा आदेश लागू केले आहे आहेत.यावेळी कृषी उत्पन्न बाजार समितीच्या आवारात गाव्याला पाहण्यासाठी नागरिकांची प्रचंड गर्दी केली.

विश्रामबाग पोलिस ठाण्याचे पोलिस निरीक्षक कल्लाप्पा पुजारी, सहाय्यक निरीक्षक अमित कुमार पाटील, वन विभागाचे उपवनसंरक्षक विजय पाटील, मानद वन्यजीव रक्षक अजित कुमार पाटील यांच्यासह प्राणीमित्र मुस्तफा मुजावर, कौस्तुभ पोळ, तबरेज खान, निखिल शिंदे अनेक प्राणी मित्र या ठिकाणी उपस्थित आहेत.

सांगली शहरातील आसपास गेल्या दोन दिवसांपासून गवा रेडा फिरत आहे. आज पहाटेच्या सुमारास गवा रेड्यानं सांगली शहरात एन्ट्री केली. आणि सांगलीच्या कृषी उत्पन्न बाजार समितीच्या मार्केट मध्ये गवा रेडा घुसला आहे. त्यामुळे परिसर बंद करण्यात आला आहे. गाव्याला पाहण्यासाठी मार्केट यार्ड समोर बघ्यांची मोठी गर्दी झाली आहे.

आज सकाळपासून मार्केटयार्ड परिसरातील दोन्ही मुख्य प्रवेश द्वार बंद करण्यात आले असून, सर्व वाहतूक बंद करण्यात आली आहे. सकाळी आठच्या सुमारास सारा मार्केट परिसर शांत होत बाजार समितीच्या अधिकारी संचालकांनी घटनास्थळी धाव घेत बंदचे आवाहन केले.