न्यायालयाच्या वेळेतही बदल, अतितात्काळ खटलेच चालणार

नगर : "कोरोना' संसर्गाच्या भीतीमुळे न्यायालयीन कामकाजाची वेळ सकाळी 11 ते 2 करण्यात आली असून, अतितत्काळ खटल्यांचे कामकाज फक्त सुरू ठेवण्यात आले होते. त्यामुळे आज सकाळी पक्षकारांनी न्यायालयाच्या प्रवेशद्वारात गर्दी केली होती. 

उच्च न्यायालयाच्या आदेशानुसार प्रधान जिल्हा न्यायाधीश श्रीकांत आणेकर यांनी जिल्हा न्यायालयासह सर्व न्यायालयांची कामकाजाची वेळ सकाळी 11 ते 2 अशी ठेवली आहे. या वेळेत न्यायालयातील वकिलांचा कक्ष, कॅंटीन बंद ठेवण्यात आली आहे. तसेच, अतितत्काळ खटल्यांचेच कामकाज आज सुरू ठेवण्यात आले होते. त्यात आरोपींचा जामीनअर्ज, मनाई हुकमाचे अर्ज, रिमांड, अशा केसेसचा समावेश होता. त्यामुळे ठरावीक वकिलांना न्यायालयात प्रवेश देण्यात आला.

पक्षकारांसाठी प्रवेशद्वारात माहिती सुविधा केंद्र तयार करण्यात आले आहे. तेथून त्यांना खटल्याच्या तारखांची माहिती मिळणार आहे. आज सकाळी पक्षकारांनी न्यायालयाच्या प्रवेशद्वारात गर्दी केली होती. अनेकांना माहिती सुविधा केंद्रातून खटल्याची पुढील तारीख देण्यात आली.

पहिलाच दिवस असल्याने जिल्ह्यातील विविध भागांतून आलेल्या पक्षकारांनी न्यायालयाच्या प्रवेशद्वारात गर्दी केली होती. त्यामुळे पोलिसांना बंदोबस्त वाढवावा लागला. आणखी काही दिवस अशीच परिस्थिती राहणार असल्याचे सूत्रांकडून समजले. 

"लोकअदालत' पुढे ढकलली 
जिल्हा विधी न्याय प्राधिकरणामार्फत 11 एप्रिल रोजी विविध तंटे मिटविण्यासाठी "लोकअदालती'चे आयोजन करण्यात आले होते. मात्र, "कोरोना' संसर्गाच्या पार्श्‍वभूमीवर ती 25 एप्रिल रोजी ठेवण्यात आल्याची माहिती सूत्रांकडून समजली