'डॉ. आंबेडकरांनी ज्या न्यायालयात युक्तिवाद केला, तिथून मी..'; संसदेत काँग्रेस खासदाराच्या पहिल्याच भाषणाने वेधलं लक्ष

चिक्कोडी : डॉ. बाबासाहेब आंबेडकर (Dr. Babasaheb Ambedkar) यांनी चिक्कोडी न्यायालयात युक्तिवाद केला होता. तिथून या सभागृहात प्रवेश केल्याचा मला अभिमान आहे, असे खासदार प्रियंका जारकीहोळी (MP Priyanka Jarkiholi) यांनी गुरुवारी संसद अधिवेशनात सभागृहातील पहिल्या भाषणात सांगितले.

यावेळी खासदार जारकीहोळी यांनी तरुणांच्या प्रगतीसाठी संसदेत (Parliament) आवाज उठवला. परीक्षांमधील गोंधळाने तरुणांचा व्यवस्थेवरील विश्वास कमी होईल, असे सांगून सर्वांचे लक्ष वेधले. खासदार जारकीहोळी संसदेत म्हणाल्या, एखाद्या देशाची प्रगती त्या देशातील शिक्षणाच्या गुणवत्तेवरून मोजली पाहिजे. त्यासंदर्भात मी काही मुद्दे सभागृहासमोर ठेवत आहे. आपल्या देशातील शिक्षणाचा स्तर घसरत चालला आहे. या देशासमोरील अनेक आव्हानांपैकी हे एक आव्हान आहे. याची अनेक कारणे आहेत.

यापैकी काही केंद्र सरकारचे शिक्षणासाठीचे वार्षिक अंदाजत्रक वर्षानुवर्षे कमी पडत असल्याचेही आहे. उदाहरणार्थ गेल्या वर्षीचे अनुदान आणि या वर्षीच्या सुधारित अंदाजपत्रकाच्या तुलनेत केंद्रीय विद्यापीठ अनुदान आयोगाला दिलेले अनुदान ५३ टक्‍क्‍यांपेक्षा कमी आहे. त्यामुळे सरकारी संस्थांवर अवलंबून असलेल्या गरिबांचे जीवन दयनीय होत आहे. यावर उपाय काय? असा प्रश्न मला तुमच्यामार्फत केंद्रीय शिक्षणमंत्र्यांना विचारायचा आहे. माझ्या जिल्ह्यातील गोकाक आणि अथणीला नवीन केंद्रीय शाळा मंजूर करण्याची विनंती आम्ही केंद्राकडे केली आहे. मात्र, केंद्राकडून कोणतेही उत्तर आले नाही. ते लवकर सुरू करावेत, अशी विनंती मी तुमच्यामार्फत केंद्रीय शिक्षणमंत्र्यांना करू इच्छितो.

पूरग्रस्त शाळांना मदत द्या

माझ्या मतदारसंघात सध्या पूर आला आहे. अनेक शाळांच्या इमारती कोसळल्या आहेत किंवा मोडकळीस आल्या आहेत. याची पुनर्बांधणी करण्यासाठी केंद्राकडून प्रत्येक शाळेला दोन लाखांची मदत होणार आहे. मात्र, हा निधी माझ्या मतदारसंघात आलेला नाही. तो लवकरात लवकर देण्यात यावा. यामध्ये आणखी रक्कम वाढवून द्यावी, अशी विनंती खासदार जारकीहोळी यांनी सभापतींकडे केली.