‘ऑक्सिजन’विरला हवेत?

सांगली: जिल्ह्यात कोरोना संकटाच्या दीड वर्षात रुग्णांना नेमका किती ऑक्सिजन वापरला गेला, याचा कोणताही एकत्रित हिशेब जिल्हा प्रशासन, औषध प्रशासन आणि शासकीय वैद्यकीय विभागाकडे उपलब्ध नाही. त्या काळात नियमित अहवाल पाठवले गेले होते, मात्र ऑक्सिजन वापराची एकूण स्थिती काय राहिली? खासगी रुग्णालयांनी दाखवलेला वापर आणि प्रत्यक्ष उपलब्ध झालेला ऑक्सिजन याचा ताळमेळ लागतो आहे का, याचे कोणत्याही स्वरूपाचे ऑडिट झाले नसल्याची माहिती समोर आली आहे.

जिल्ह्यात मार्च २०२० मध्ये कोरोनाचा पहिला रुग्ण आढळला होता. आतापर्यंत सुमारे दोन लाखांहून अधिक रुग्णांवर कोरोनाचे उपचार करण्यात आले. जिल्ह्यात एकवेळ ऑक्सिजनचा मोठा तुटवडा निर्माण झाला होता आणि त्यातून रुग्णांच्या जीवावर बेतण्याची वेळ आली होती. त्यातील किती रुग्णांना ऑक्सिजनचा वापर केला गेला? किती रुग्णांना व्हेंटिलेटरवर ठेवले गेले? जिल्ह्यात ऑक्सिजन किती आले? सर्व रुग्णालयांनी दाखवलेला ऑक्सिजनचा वापर आणि प्रत्यक्षात उपलब्ध ऑक्सिजन याचा ताळमेळ लागतो आहे का, या सर्व प्रश्‍नांची उत्तरे आतापर्यंत तरी प्रशासनाने शोधलेली नाहीत. हा संवेदनशील विषय असूनही जिल्हा प्रशासनाकडून त्याचा सखोल अहवाल का बनवला गेला नाही, हे अनुत्तरीत आहे.

‘सकाळ’ने गेल्या दोन महिन्यांपासून औषध प्रशासनाकडे याबाबतची आकडेवारी उपलब्ध करण्यासाठी पाठपुरावा केला. ऑक्सिजनच्या वापराचे आणि व्यवहाराचे ऑडिट झाले असेल; तर त्याबाबतचे अहवाल मागितले. या विषयाला प्रशासनाकडून प्रतिसाद मिळाला नाही. असा कोणताही अहवाल अद्याप तयार करण्यात आला नसल्याचे सांगण्यात आले. कोरोना काळात रोजची आवक आणि वापर याची माहिती राज्य शासनाकडे पाठवली जात होती, मात्र त्याचे एकत्रीकरण केले नाही, असे औषध प्रशासनाकडून सांगण्यात आले. मिरजेत ॲपेक्स रुग्णालयाने घातलेला घोळ सर्वांनी पाहिला आहे. रुग्णांच्या जीवाशी खेळ केला गेला. कुपवाड परिसरातील आणखी एका रुग्णालयावर संशय व्यक्त केला गेला होता. इतके सारे घडलेले असताना ऑक्सिजनच्या वापराच्या नियंत्रणाबाबत आणि त्याच्या एकूण ऑडिटबाबत गांभीर्य का नाही, हा महत्त्वाचा मुद्दा आहे.

कोरोनाकाळातील वापराचा हिशेब मिळेनाऑडिटबद्दलही शंकाच सकाळ’च्या पाठपुराव्यालाहीप्रतिसाद नाही