कोगनोळी : हालसिद्धनाथ महाराज की जय, चांगभलं च्या जयघोषात कुर्ली-आप्पाचीवाडी येथील हालसिद्धनाथ यात्रेच्या मुख्य दिवशी हजारो भाविकांनी दर्शनासाठी गर्दी केली होती. गुरुवारी कुर्ली, आप्पाचीवाडी पालखी सवाद्य मिरवणुकीने खडक मंदिरात आणली. तेथे विविध धार्मिक कार्यक्रम झाले. मान्यवरांच्या उपस्थितीत कर बांधली.
नियमित सकाळी, सायंकाळी सात वाजता आरती व विविध धार्मिक कार्यक्रम झाले. दररोज रात्री ढोल जागर (वालंग), पहाटे पालखी प्रदर्शना काढली. शनिवारी (ता. 23) पहाटे भगवान ढोणे यांची पहिली भाकणूक झाली. या भाकणुकीत भगवान ढोणे यांनी, देशात समान नागरी कायदा येईल, गोरगरीब जनता सुखी आनंदी व समाधानी राहील, जगात तापमानाचा धोका वाढत जाईल, जंगलात आग लागेल, जंगल नष्ट होतील, वन्य जीवन व वनस्पती औषध पृथ्वीवरून नष्ट पावतील, पावसाअभावी पेरणी पाण्याचा ऋतुमान बदलून जाईल अशी नवीन भाकिते केली.
रविवारी यात्रेचा मुख्य दिवस असल्याने सकाळी सात वाजता मानकरी, पुजारी व ग्रामस्थांच्या उपस्थितीत आरती करून विविध धार्मिक कार्यक्रम झाले. भाविकांनी दंडवत घातले. दिवसभर नैवेद्य देण्यासाठी आप्पाचीवाडी, कुर्ली येथील भाविकांनी गर्दी केली होती.
मंदिर परिसरात गर्दी होऊ नये म्हणून निपाणी ग्रामीण पोलिस ठाण्यातर्फे उपनिरीक्षक अनिल कुंभार यांच्या मार्गदर्शनाखाली पोलिस फौजफाटा तैनात केला होता. प्रशासनाने यात्रा बंद म्हणून सांगितल्याने या ठिकाणी कोणत्याही प्रकारची दुकाने लावली नव्हती. भाविक दर्शन घेऊन आपल्या घरी परतत होते. पोलिस प्रशासनासह अन्य कर्मचाऱ्यांना व भाविकांना कल्लाप्पांना पत्रावळे यांच्यातर्फे चहा, नाश्ता, जेवण व महाप्रसादाची सोय केली होती. सौंदलगा प्राथमिक आरोग्य केंद्रातर्फे आरोग्य सेविका अश्विनी पाटील काम पाहत आहेत.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
