फडणवीस यांच्यामुळेच भाजपची अवस्था बिकट : एकनाथ खडसे

सोनई (नेवासे, नगर): ""भारतीय जनता पक्षाला सर्वत्र अच्छे दिन असताना, महाराष्ट्रात मात्र माजी मुख्यमंत्री देवेंद्र फडणवीस आणि त्यांच्या म्होरक्‍यांमुळे पक्षाची अवस्था बिघडत आहे. कुणी कितीही रोखायचा प्रयत्न केला तरी नाराजीचे चक्रीवादळ आजही घोंगावत आहे,'' असे रोखठोक मत माजी महसूलमंत्री व पक्षाचे ज्येष्ठ नेते एकनाथ खडसे यांनी आज व्यक्त केले.

हेही वाचा- देवेंद्र फडणवीस यांनी नवीन ज्योतिषी शोधावा : थोरात 

खडसे यांनी आज परिवारासह शनिशिंगणापूर येथे जाऊन शनिदर्शन घेतले. त्या वेळी उदासी महाराज मठात त्यांनी "इडा पिडा टळो'चा अभिषेक केला. जनसंपर्क कार्यालयात माजी आमदार बाळासाहेब मुरकुटे यांनी त्यांचा सत्कार केला. या वेळी भाजपचे तालुकाध्यक्ष नितीन दिनकर, जिल्हा उपाध्यक्ष सचिन देसरडा, शनिशिंगणापूरचे सरपंच बाळासाहेब बानकर उपस्थित होते.

फडणवीस टीमवर नाराज

या वेळी पत्रकारांशी बोलताना खडसे म्हणाले, ""मी भाजपवर नाराज नाही, तर पक्षातीलच फडणवीस यांच्या टीमवर नाराज आहे. वेळ आल्यावर मी माझ्या मनातील रोष व्यक्त करणारच आहे.'' 

हेही वाचा- भगवानगडावर फुलला भक्तीचा मळा 

"वेळ आल्यावर धमाका होणारच!'

पक्षाविरुद्ध बंड करणार का? या प्रश्‍नावर "वेळ आल्यावर धमाका होणारच आहे,' असे खडसे यांनी स्पष्ट केले. महाविकास आघाडी सरकारमध्ये एकमत नसल्याने ही खिचडी फार दिवस टिकणार नाही, अशी टीकाही त्यांनी केली.