माजी मंत्री मल्हारगौडा पाटील यांचे निधन 

संकेश्वर ( बेळगाव ) - माजी मंत्री, सलग सात वेळा आमदार म्हणून निवडून आलेले व एस. बंगारप्पा यांच्या मंत्रिमंडळात पाटबंधारे खात्याची धुरा यशस्वीपणे पार पाडलेले येथील सुपूत्र माजी मंत्री मल्हारगौडा पाटील (वय 79) यांचे मंगळवारी (ता. 31) रात्री उशिरा हृदयविकाराने राहत्या घरी निधन झाले. बुधवारी (ता. 1) दुपारी 1 वाजता त्यांची अंत्ययात्रा काढण्यात आली.

हेही वाचा - जाधव यांना मंत्रिमंडळातून डावलल्याने यांच्या जबाबदारीत वाढ

हजारो मान्यवरांनी त्यांना अखेरचा निरोप देण्यासाठी उपस्थिती दर्शविली. त्यांच्या निधनामुळे संकेश्वर शहर व परिसरावर शोककळा पसरली आहे. बुधवारी येथील दुरदुंडेश्वर विद्या संवर्धक संघ, हिरण्यकेशी शिक्षण मंडळ, पंचाचार्य शिक्षणसंस्था, गौतम शिक्षण संस्था, स्वामी विवेकानंद शिक्षणसंस्था यांच्यासह विविध संघ संस्थांनी सुट्टी जाहीर केली होती. शहरातील व्यापाऱ्यांनीही आपले व्यवहार बंद ठेवून अंत्ययात्रेत सहभाग दर्शविला. दुपारी 1 वाजता त्यांच्या नवीगल्ली येथील निवासस्थानापासून अंत्ययात्रेस प्रारंभ झाला. नवीगल्ली, महालक्ष्मी मंदिर, गांधीचौक, रंगाची चावडी, सुभाषरोड, कार्पोरेशन बँकमार्ग, हिरण्यकेशी सहकारी साखर कारखान्यानजीक असलेल्या त्यांच्या शेतीमध्ये त्यांच्यावर अंत्यसंस्कार करण्यात आले. कुणालगौडा यांनी विधी केले. 

हेही वाचा - PHOTOS : सांगलीत मध्यरात्री वाहनांच्या तोडफोडीचा प्रकार 

यावेळी माजी मंत्री, आमदार उमेश कत्ती, माजी खासदार प्रकाश हुक्केरी, माजी खासदार रमेश जिगजिनगी, पवन कत्ती, माजी आमदार श्रीपतराव शिंदे, माजी पालकमंत्री शशिकांत नाईक, उद्योगपती एस. एस. पाटील, माजी नगराध्यक्ष आप्पासाहेब शिरकोळी, अमर नलवडे, संगम सहकारी साखर कारखान्याचे अध्यक्ष राजेंद्र पाटील, शंकरराव भांदुर्गे, गजानन कोळ्ळी, राजेंद्र संसुद्दी, संजय नष्टी, अभिजीत कुरणकर, सोमशेखर कणगली, पवन पाटील, बसवराज बागलकोटी यांच्यासह नगरसेवक, जिल्हा, तालुका पंचायत सदस्यांसह विविध क्षेत्रातील मान्यवर उपस्थित होते. माजी मंत्री मल्हारगौडा पाटील आद्य निजलिंगेश्वर शिक्षण संस्थेचे अध्यक्ष, निडसोसी एसजेपीएन ट्रष्टचे उपाध्यक्ष यासह विविध सहकारी संघ संस्थांचे मार्गदर्शक होते. त्यांच्या मागे पत्नी, सून, मुलगी, नातू असा परिवार आहे.