Fertilizer Rate : जागतिक बाजारात रासायनिक खत दरात घसरण

सांगली : चार-पाच महिन्यांपासून जागतिक पातळीवर रासायनिक खतांच्या दरात घसरण सुरू आहे. फेब्रुवारीमध्ये डीएपीचे दर ६८ हजार ८१२ रुपये प्रतिटन होते. सध्या ४५ हजार ३०१ रुपये प्रतिटनवर आहेत. युरियाचे दर २६ हजार ६२४ रुपये प्रतिटनावरून २५ हजार ८०४ रुपये प्रतिटन झाला आहे. देशात रासायनिक खतांच्या किमती सन २०२१-२२ च्याच कायम आहेत. खतांचे दर प्रतिबॅग किमान १५० ते ३०० रुपयांनी कमी होणे अपेक्षित आहे.

एमओपीचे दर प्रतिटन ४८ हजार ३३२ रुपयांवरून ३४ हजार ५७० रुपयांवर आले आहेत. भारतात दरवर्षी किमान १०० लाख टन डीएपीचा वापर केला जात असून, ६० लाख टन डीएपी आयात केले जाते. युरियाचा वापर किमान १०० लाख टन आहे. एमओपीचा वापर २६ लाख टन असून, २५ लाख टन एमओपी आयात केले जाते. एनपीके मिश्र खतांचा वापर ११५ लाख टन असता तरी १२ ते १४ लाख टन मिश्र खते आयात केली जातात.

युरियाच्या उत्पादनात अमोनिया वायूचा वापर केला जातो. पूर्वी अमोनियाचे दर ९८ हजार ३०४ रुपये प्रतिटन होता. आता दर कमी झाला आहे. एप्रिलच्या दुसऱ्या आठवड्यात अमोनिया वायूचे दर ३० हजार ७२० रुपये प्रतिटन झाले आहेत. डीएपीच्या उत्पादनासाठी वापरल्या जाणाऱ्या फॉस्फरिक ॲसिडचे दर प्रतिटन १ लाख २० हजार ८१७ रुपयांवरून ८६ हजार १६ रुपयांवर आले आहेत. परिणामी, जागतिक बाजारात रासायनिक खते आणि ती तयार करण्यासाठी वापरल्या जाणाऱ्या कच्च्या मालाचे दर कमी होत असल्याने भारतात सर्वच रासायनिक खतांचे दर कमी व्हायला हवे, असे मत व्यक्त होत आहे.

रासायनिक खतांचे सध्याचे दर (रुपये-प्रतिबॅग)

• डीएपी १,३५०

• एसएसपी ५५०

• युरिया २६६

मिश्र खते-

• १०:२६:२६ - १,४७०

• २०:२०:००:१३ - १,२५०

• १५:१५:१५ - १,४७०

गेल्या चार वर्षांपासून शेती व शेतकरी हैराण झाले आहेत. सध्या रासायनिक खतांच्या कच्च्या मालाचे दर कमी होत आहेत. त्यामुळे केंद्र सरकारने खतांचे दर कमी करून शेतकऱ्यांना दिलासा द्यावा. यासाठी संघटनेकडून मागणीचा रेटा सुरु ठेवला जाणार आहे. खतांचा पुरवठाही सुरळी ठेवला पाहिजे.

- अविनाश पाटील, अध्यक्ष, ॲग्रो इनपुस्टस संघटना, सांगली