पन्हाळा तालुक्यात चार सेंद्रिय शेती गटांना ‘ग्रीन सर्टिफिकेट’

माजगाव - सेंद्रिय शेतीला प्रोत्साहन देत आरोग्यपूर्ण सकस अन्नधान्य, भाजीपाला मोठ्या प्रमाणावर उत्पादित व्हावा, ग्राहकांना सेंद्रिय शेतीमाल मिळावा. यासाठी केंद्र सरकारच्या महत्वाकांक्षी अशा परंपरागत कृषी विकास योजनेची दोन वर्षांपूर्वी सुरवात झाली. त्यातीलच एक अंतिम टप्प्यातील ग्रीन सर्टिफिकेशनचा महत्वाचा भाग पन्हाळा तालुक्‍यातील चारही सेंद्रिय गटांनी पूर्ण केला असून त्यांना सेंद्रिय प्रमाणिकरण प्रक्रियेंतर्गत ग्रीन सर्टीफिकेट प्रदान करण्यात आले आहे. 

या योजनेमधून पन्हाळा तालुक्‍यात प्रत्येकी ५० एकर क्षेत्राचे असे एकूण चार शेतकरी गट स्थापन झाले आहेत. या चार गटांच्या माध्यमातून तालुक्‍यातील दोनशे एकर क्षेत्र सेंद्रियखाली आले आहे. 

तीन वर्षांच्या योजनेद्वारे सहभागिता हमी पद्धतीने शेतकरी गटाच्या शेतजमिनीचे सेंद्रिय प्रमाणीकरण करुन देण्यात येणार आहे. कासारी खोरे सेंद्रिय शेती गट (बाजार भोगाव), मोताईदेवी गट (वारणूळ), सह्याद्री गट (आळवे) आणि श्री ज्योतिर्लिंग गट (केखले) या चार गटांची पीजीएस सेंद्रिय प्रमाणिकरणाकडे वाटचाल सुरू आहे. परंपरागत कृषी विकास योजनेत सहभागी होण्यामागे सेंद्रिय शेतीमधील जिज्ञासा कारणीभूत ठरली. प्रामाणिक हेतूने सेंद्रिय शेती केली तर उत्पादन खर्चात बचत तर होतेच शिवाय उत्पादित मालाचा दर्जाही सुधारतो, असे ज्योतिर्लिंग सेंद्रिय शेती उत्पादन (केखले) प्रक्रिया गटाचे उपाध्यक्ष राहुल घेवारी यांनी सांगितले.

आमच्या चारही सेंद्रिय शेती गटांचा व्यावसायिक उद्देशाने सेंद्रिय शेती करण्याकडे कल आहे. परंपरागत कृषी विकास योजनेतील प्रत्येक बाबींची या गटांनी चांगल्या पद्धतीने अंमलबजावणी केली आहे.
- पराग परीट, तालुका तंत्रज्ञान व्यवस्थापक,  कृषी विभाग, पन्हाळा 

पन्हाळा तालुक्‍यात असलेली हवामानाची, पिकांची, जमिनीची वैविध्यता आणि सेंद्रिय शेती करणाऱ्या शेतकऱ्यांची प्रामाणिक धडपड, यामुळे तालुक्‍यात सेंद्रिय शेतीचा प्रचार आणि प्रसार मोठ्या प्रमाणावर होताना दिसत आहे. 
- बंडा बापू कुंभार, तालुका कृषी अधिकारी, पन्हाळा