पालकमंत्रीपदावरून मंत्री हसन मुश्रीफ यांची गुगली

कोल्हापूर  ः जिल्ह्याच्या पालकमंत्रीपदी मोठा भाऊ म्हणून माझेच नांव गृहराज्यमंत्री सतेज पाटील यांनी सुचवावे, अशी गुगली आज ग्रामविकास मंत्री हसन मुश्रीफ यांनी टाकली. गृहराज्यमंत्री सतेज पाटील यांच्या उपस्थितीतच ही गुगली टाकल्याने जिल्हा परिषद सदस्याही आवाक झाले. पदासाठी गृहराज्यमंत्री सतेज पाटील यांचे नांव जरी पुढे आले तरी माझी काहीही हरकत नाही, अशी पुष्टीही श्री. मुश्रीफ यांनी जोडली.
पालकमंत्री पदी महसूल मंत्री बाळासाहेब थोरात यांची नियुक्ती झाली आहे. त्याचवेळी श्री. मुश्रीफ यांची नगरचे तर श्री. पाटील यांची भंडारा जिल्ह्याचे पालकमंत्री म्हणून नियुक्ती झाली. कोल्हापूरचे पालकमंत्री पद मिळावे यासाठी या दोघांचेही प्रयत्न होते. त्यातही कॉंग्रेसचे आमदार जिल्ह्यात जास्त असल्याने पद मिळावे यासाठी श्री. पाटील यांनी ताकद लावली होती. दरम्यानच्या काळावत श्री. थोरात यांनीच पालकमंत्री पद स्वीकारण्यास नकार दिला आहे.

हे पण वाचा - राणेंवर दबाव ठेवण्यासाठी रत्नागिरीत सामंत अस्त्र

या पार्श्‍वभुमीवर शासकीय विश्रामगृहावर बैठकीसाठी आलेल्या श्री. मुश्रीफ यांना विचारले असता ते म्हणाले, ""मोठा भाऊ समजून श्री. पाटील यांनी माझे नांव पालकमंत्री पदासाठी सुचवावे. जिल्ह्यात कॉंग्रेसचे आमदार जास्त असल्याने श्री. पाटील यांचे नांव पालकमंत्री पदासाठी पुढे आल्यास माझी हरकत नाही. यावरून मी व सतेज पाटील यांच्यात कोणताही वाद किवा इर्षा नसल्याचे त्यांनी सांगितले.