निपाणीसह परिसरात मुसळधार पाऊस; नागरिकांची तारांबळ

निपाणी - शहर व परिसरात गुरुवारी (ता. 10) सायंकाळी 7 च्या सुमारास सुसाट वारयासह विजांच्या गडगडासह मुसळधार पाऊस (Rain) झाला. अचानक आलेल्या पावसामुळे फेरीवाल्यांसह व्यापारयांची (Traders) तारांबळ उडाली. शहरातील मुख्य आठवडी बाजार असल्याने नागरिकांची बाजारासाठी वर्दळ वाढली होती. दुपारी परिसरात ठिकठिकाणी पाऊस झाला. सायंकाळी दमदार पाऊस झाल्याने नागरिकांची तारांबळ उडाली. वीज पुरवठा खंडीत झाल्यामुळे बसस्थानकासह शहरात अंधाराचे साम्राज्य पसरले होते.

आंबा मार्केट, अक्कोळ रोडसह परिसरात ठिकठिकाणी खड्ड्यात पाणी साचल्याने दुचाकीस्वारांसह वाहनधारकांना खड्ड्यांचा अंदाज येत नव्हता. त्यामुळे वाहने सावकाश हाकावी लागली. शिवाय वाहन चालविताना कसरत करावी लागली. आठवडी बाजारामुळे नागरिकांची ये-जा सुरु होती. दमदार पाऊस असल्याने ठिकठिकाणी पाणी साचून राहिले होते. गटारी भरून वाहत होत्या.

जत्राट परिसरात पाऊस

जत्राट व परिसरात गुरुवारी सायंकाळी जोराचा पाऊस झाला. त्यामुळे शेतकरयांची तारांबळ उडाली. सध्या विविध कामे सुरु असून सायंकाळी अचानक पाऊस आल्याने कामांची खोळंबा झाला. वीज पुरवठा खंडीत झाल्यामुळे गृहिणींची तारांबळ झाली. तब्बल तासभर पाऊस झाल्याने सर्वत्र पाणी साचले होते.