सात महिन्यांनंतर ती आली अन् माघारीही गेली

इचलकरंजी : सात महिने झाले बंद असलेली कर्नाटक एसटी भाऊबिजेला शहरात धावली. यामुळे प्रवाशांत आनंद होता मात्र एसटी कर्नाटकात परतीच्या मार्गावर निघाली, ती त्यानंतर पुन्हा फिरकली नाही. कर्नाटकातून केवळ एकच फेरी शहरात का आली, याचे नेमके कारण इचलकरंजी बस स्थानकातून प्रवाशांना जेव्हा समजले. तेव्हा प्रवाशांचा चांगलाच हिरमोड झाला. मात्र अद्यापही एसटीत बसून शहरातून कर्नाटकात जाण्यास प्रवाशांना प्रतीक्षाच करावी लागणार आहे.

शनिवारी एसटी बोरगावपर्यंत आल्यानंतर महाराष्ट्रातील एका प्रवासी महिलेचे मंगळसूत्र हरवल्याची घटना घडली. या वेळी या महिलेने बसमध्ये प्रचंड गोंधळ घातला. त्यांनतर या महिलेसह महाराष्ट्रात येणाऱ्या‍ अन्य प्रवाशांनी इचलकरंजीत सोडण्याची विनंती केली. वाढता गोंधळ पाहता त्यानंतर बसचालकाने एसटीतील प्रवाशांना इचलकरंजी शहरात आणून सोडले. त्यामुळे कर्नाटकची बस शनिवारी इचलकरंजीत धावली.

कोरोनाच्या दुसऱ्या लाटेत कर्नाटक-इचलकरंजी एसटी सेवा ठप्प झाली आहे. सात महिने ओलांडले तरी निपाणी, बेळगाव आगारातून एकही एसटी शहरात येत नाही. यामुळे सीमाभागासह इचलकरंजीतून कर्नाटकात होणारी दैनंदिन प्रवाशांचा गैरसोय झाली आहे. दिवाळीच्या तोंडावर ती तरी एसटी सेवा सुरू होईल, अशी आशा प्रवाशांना होती. भाऊबिजेला दुपारी एक वाजण्याच्या सुमारास कर्नाटकातून निपाणी आगाराची एसटी शहरात आली. एसटी दिसताच बस स्थानकावरील प्रवाशांत आनंद संचारला. एसटी सेवा सुरू झाली असे प्रवाशांना वाटत असताना दुसऱ्या तासानंतर दिवसभर मात्र कर्नाटकातून एकही बस शहरात फिरकली नाही. याबाबत प्रवाशांनी बस स्थानकातत चौकशी केली असता एसटीची केवळ एक फेरीच आल्याचे कारण समजले. सध्या निपाणी, बेळगाव आगारातून एसटी सेवा बोरगावपर्यंत मर्यादित आहे. बोरगावच्या पुढे सीमा असल्याने कर्नाटक एसटी पुढे धावत नाहीत.

साहेब, भाऊबिजेला तरी सोडा

दिवाळीचा हंगाम त्यात भाऊबीज म्हणजे एसटीसाठी दिवाळीच असते. वर्षभरातील रेकॉर्डब्रेक उत्पन्न एसटी आगार मिळवते. शनिवारी इचलकरंजी बस स्थानकावर कर्नाटक सीमाभागात व कर्नाटकात जाण्यासाठी अनेक प्रवासी दाखल झाले. मात्र इथून कर्नाटकात जाण्यासाठी आणि कर्नाटकातून महाराष्ट्रात एसटी सेवा बंद आहे. खासगी वाहतुकीच्या अवाजवी दरामुळे साहेब भाऊबीजला तरी कर्नाटकात एसटी सोडा, अशी विनंती प्रवासी करताना दिसले.