'तुतारी' हाती घेताच समरजितसिंह घाटगेंची 'डीपीडीसी'वरून गच्छंती; नामनिर्देशित सदस्यपदावरील नियुक्ती रद्द

मुंबई : भाजपला (BJP) रामराम ठोकून राष्ट्रवादी काँग्रेस (शरदचंद्र पवार) पक्षात प्रवेश केलेले कागल येथील नेते समरजितसिंह घाटगे (Samarjit Singh Ghatge) यांची कोल्हापूर जिल्हा नियोजन समितीवरील (डीपीडीसी) नामनिर्देशित सदस्यपदावरील नियुक्ती रद्द केली आहे.

घाटगे यांच्यासह माजी आमदार बजरंग देसाई यांचे चिरंजीव राहुल यांची नियुक्तीही रद्द केली आहे. नियोजन विभागाने शुक्रवारी यासंदर्भात शासन निर्णय जारी केला. महायुतीत कागल विधानसभेची जागा राष्ट्रवादी काँग्रेस पक्षाला जाणार असल्याचे स्पष्ट झाल्यानंतर घाटगे यांनी भाजपच्या ग्रामीण जिल्हाध्यक्षपदाचा राजीनामा देऊन ‘तुतारी’ हाती घेतली.

घाटगे यांनी भाजपला सोडचिट्ठी दिल्याने अजित पवार यांच्याकडील नियोजन विभागाने त्यांची कोल्हापूर ‘डीपीडीसी’वरील नियुक्ती रद्द केली. या समितीवर डॉ. सुभाष जाधव आणि ॲड. हेमंत कोलेकर यांची विशेष निमंत्रित म्हणून नियुक्ती केली आहे.