त्र्यंबोली यात्रांचा जल्लोष ; यंदा श्रावणाबरोबरच मोहरमचीही धूम

कोल्हापूर : आषाढातील त्र्यंबोली यात्रांचा (Ashadhi Trimboli Yatra) जल्लोष आता खऱ्या अर्थाने सुरू होणार आहे. उद्या (मंगळवारी) बहुतांश पेठांमध्ये यात्रा होणार असून आज रात्रीपासूनच त्याच्या तयारीला प्रारंभ झाला. शुक्रवार (ता.६) आषाढातील अखेरचा शुक्रवार असून यादिवशी या यात्रांची सांगता होणार आहे.

दरम्यान, आषाढातील यापूर्वीच्या मंगळवार व शुक्रवारी घरगुती नैवेद्य अर्पण करण्यासाठी टेंबलाई टेकडीवर भाविकांनी गर्दी केली. पण, आता गल्ल्यांची यात्रा होणार असून अधिक गर्दी होणार नाही, याची खबरदारी घेण्यात आली आहे. मंदिर दर्शनासाठी बंदच असून मोजक्याच भाविकांनी बाहेरून दर्शन व इतर विधी करावेत, असे आवाहन वहिवाटदार पुजारी मंडळाने केले आहे.

आषाढ सांगतेकडे निघाला असताना आता श्रावणाच्या अध्यात्मिक आनंदोत्सवाची चाहूल लागली आहे. यंदाच्या श्रावणात एकूण पाच सोमवार मिळणार असून शिव मंदिरे यंदा तरी दर्शनासाठी खुली होतील का, याबाबत भाविकांमध्ये उत्सुकता आहे. यंदा अधिक मासामुळे हिंदू-मुस्लीम ऐक्याचे प्रतिक असलेला मोहरमचा सण एक महिना अगोदर आला आहे. यापूर्वी नवरात्रोत्सव आणि गणेशोत्सवात मोहरमची धूम अनुभवायला मिळाली. यंदा मात्र श्रावणाच्या दुसऱ्या दिवशीपासूनच मोहरमला प्रारंभ होणार आहे. शहरात अडीचशेहून अधिक ठिकाणी पंजे प्रतिष्ठापना होणार असून १८ ऑगस्टला खत्तलरात्र तर १९ ऑगस्टला पंजे विसर्जन होणार आहे.