उमेदवारी मिळाली तर आनंदच, पण अजून ऑफर नाही; लोकसभा निवडणुकीबाबत शाहू छत्रपती महाराजांचं सूचक विधान

कोल्हापूर : ‘लोकसभा निवडणुकीसाठी (Loksabha Election) उमेदवारीबाबत सकारात्मक चर्चा होत आहे. मात्र अद्याप तसा निरोप आलेला नाही. उमेदवारी मिळाली तर आपण सर्वजण मिळून ही मोहीम यशस्वी करू,’ असे सूचक वक्तव्य श्रीमंत शाहू छत्रपती महाराज (Shahu Chhatrapati Maharaj) यांनी केले.

श्रीमंत शाहू छत्रपती महाराज यांना लोकसभेची उमेदवारी मिळावी, यासाठी महाविकास आघाडीचे पदाधिकारी प्रयत्न करत आहेत. आगामी लोकसभा निवडणुकीसाठी महाविकास आघाडीकडून (Mahavikas Aghadi) कोल्हापूर मतदारसंघातून श्रीमंत शाहू छत्रपती महाराज यांना उमेदवारी देण्यासंदर्भात वरिष्ठ पातळीवर जोरदार हालचाली सुरू आहेत.

या संदर्भात दोन दिवसांपूर्वी खासदार शरद पवार (Sharad Pawar) यांनी देखील शाहू महाराजांची भेट घेतली होती. यातून त्यांना लोकांची पसंती आहे, ही जागा विनासायास विजयी होईल, असे मत पदाधिकाऱ्यांनी व्यक्त केले होते. त्यामुळे त्यांना कोल्हापूर लोकसभेची उमेदवारी मिळेल, अशी अपेक्षा केली जात आहे.

दरम्यान, या संदर्भात आज पहिल्यांदाच माध्यमांशी संवाद साधताना त्यांनी सूचक वक्तव्य केले असून लोकसभेची उमेदवारी मला मिळाली तर अनेकांना आनंदच होईल, असे म्हटले आहे. त्यामुळे जिल्ह्यातील राजकीय वर्तुळात जोरदार चर्चा सुरू झाली आहे.