हिंदू धर्मीयांचा हिंसक असा उल्लेख करणाऱ्या राहुल गांधींनी हिंदूंची माफी मागावी, मगच..; काय म्हणाले महाडिक?

कोल्हापूर : हिंदू धर्मीयांचा हिंसक असा उल्लेख करणाऱ्या काँग्रेस नेते राहुल गांधी (Rahul Gandhi) यांनी हिंदूंची माफी मागावी. मगच छत्रपती शिवाजी महाराजांच्या पुतळ्याचे अनावरण करावे, असे आवाहन खासदार धनंजय महाडिक (Dhananjay Mahadik) यांनी केले. तसेच त्यांनी राहुल गांधी यांच्यासमोर काही प्रश्नही उपस्थित केले आहेत. याबाबतचे पत्रक त्यांनी प्रसिद्ध केले.

पत्रकातील माहितीनुसार, राहुल गांधी यांच्या पक्षातील नेते भारताचे तुकडे होणार असे म्हणतात. खासदार आणि माजी पालकमंत्री असणारे आमदार विशाळगडावरील अतिक्रमण पाडण्यास विरोध करतात. त्यांना राहुल गांधी शिवभक्तांची माफी मागायला लावणार का?

राहुल गांधी यांच्या पक्षाचे खासदार, कार्यकर्ते स्वामी समर्थ, श्रीराम यांचा अवमान करतात. स्वतः लोकसभेमध्ये हिंदूंना हिंसक म्हणतात. त्यासाठी ते हिंदू धर्मीयांची माफी मागणार का? त्यांनी माफी मागावी, तरच त्यांना छत्रपती शिवाजी महाराजांच्या पुतळ्याचे अनावरण करण्याचा नैतिक अधिकार असेल.