Kolhapur Crime: सोळाव्या वर्षी जबरदस्तीनं पळवून नेलं, 'तिच्या'शी विवाह करून मूल जन्माला घातलं; पतीसह सासू-सासऱ्याविरुध्द गुन्हा

नागाव : अल्पवयीन मुलीचे (Minor Girls) अपहरण, बालविवाह, मूल जन्माला घालण्यास भाग पाडणे आणि शारीरिक व मानसिक छळ अशा विविध गुन्ह्यांमध्ये पती, सासू आणि सासरे यांच्यावर शिरोली एमआयडीसी पोलिस (Shiroli MIDC Police) ठाण्यात काल गुन्हा दाखल झाला.

शिरोली एमआयडीसी पोलिस ठाणे हद्दीमधील एका गावातील पती नितीन बापू मोरे, सासरा बापू मोरे आणि सासू सीता बापू मोरे अशी संशयितांची नावे आहेत. हा गुन्हा दाखल करण्यासाठीही पीडित महिलेला नाहक त्रास सहन करावा लागला.

याबाबत मिळालेली माहिती अशी : नितीन बापू मोरे याने नात्यातील मुलीला तिच्या वयाच्या सोळाव्या वर्षी जबरदस्तीने पळवून नेले. तिच्याशी विवाह करून तिला मूल जन्माला घालण्यास भाग पाडले. आणि नंतर पतीसह सासरच्या नातेवाईकांकडून पीडित मुलीचा सातत्याने शारीरिक आणि मानसिक छळ केला.

दोन दिवसांपूर्वी पतीने तिला बेदम मारहाण केली. या त्रासाला कंटाळून सहा महिन्याच्या मुलास सोबत घेऊन पीडित महिला माहेरी गेली. तेथून आपल्या आईसह तिने बाल कल्याण समितीकडे धाव घेतली. बाल कल्याण समितीने दिलेल्या पत्रानुसार पीडित मुलीने पोलिस ठाण्यात धाव घेतली.