चंद्रकांतदादांची ऋतुराज पाटलांना 'जादू की झप्पी'; कोल्हापुरमध्ये भुवया उंचावणारे चित्र

कोल्हापूर : विधानसभेच्या कोल्हापूर विधानसभा मतदार संघातील पोटनिवडणूकीत सकाळी 9 नंतर चुरस वाढत आहेत. यातच भाजपचे प्रदेशाध्यक्ष चंद्रकांतदादा पाटील (Chandrakant Patil) व कॉंग्रेसचे आमदार ऋतुराज पाटील (Ruturaj Patil) यांनी कसबा बावडा येथील मतदान केंद्रावर गळाभेट घेतली. तसेच, ऋतुराज पाटील यांच्याकडूनच पालकमंत्री सतेज पाटील (Satej Patil) यांना शुभेच्छा देत मी घरीच येणार होतो, पण तुम्ही बाहेर पडला असाल म्हणून आलो नसल्याचेही चंद्रकांतदादा पाटील यांनी सांगितले आहे. (Kolhapur Assembly By Election 2022)

दरम्यान, कसबा बावडा येथे चुरशीने मतदान सुरु आहे. निर्णायक ठरणाऱ्या कसबा बावडा मतदान केंद्रावरच दोन्ही पक्षाचे कार्यकर्ते तळ ठोकून आहेत. भाजप प्रदेशाध्यक्ष चंद्रकांत पाटील यांनी बुथवर थांबूनच मतदारांचे स्वागत केले. तर, आमदार ऋतुराज पाटील यांनी सर्वांना अभिवादन करत मतदान करण्याचे आवाहन केले. या ठिकाणी मतदारांना हलगी व कैताळ वाजवतच मतदान केंद्रावर आणण्यात आले. त्यामुळे कसबा बावडा मतदान केंद्रावर मतदानासाठी मोठी गर्दी झाली आहे. मतदारांच्या लांबपर्यंत रांगा लागल्या आहेत. दरम्यान, चंद्रकांतदादा व ऋतराज पाटील यांच्यामधील खेळीमेळीच्या संवादाने कार्यकर्ते आश्‍चर्य चकित झाले.