Jayant Patil Son: 'दुसऱ्याचा प्रचार किती दिवस? प्रतीकला हातकणंगलेची उमेदवारी द्या'; जयंत पाटलांना कार्यकर्त्यांचे साकडे

इचलकरंजी : दुसऱ्या पक्षाच्या उमेदवाराचा प्रचार आम्ही किती दिवस करायचा, प्रतीक पाटील (Pratik Patil) यांना लोकसभेची उमेदवारी द्या, असे साकडे राष्ट्रवादी काँग्रेसच्या कार्यकर्त्यांनी प्रदेशाध्यक्ष जयंत पाटील (Jayant Patil) यांना घातले.

महाविकास आघाडीचा काय निर्णय होतो ते पाहू, त्या निर्णयासोबत आपणास राहावे लागणार आहे, असे त्यांनी यावेळी कार्यकर्त्यांशी बोलताना स्पष्ट केले. प्रदेशाध्यक्ष पाटील आज इचलकरंजी दौऱ्यावर होते.

त्यांनी ‘टेक्स्पोजर’ या वस्त्रोद्योग प्रदर्शनासह पंचगंगा नदी तिरावर १०८ कुंडीय गणपती महायज्ञास भेट दिली. त्यानंतर कबनूर येथे पक्षाच्या स्थानिक कार्यकर्त्यांची भेट घेऊन चर्चा केली. यावेळी मदन कारंडे, राजीव आवळे, उदयसिंग पाटील, अब्राहम आवळे आदी उपस्थित होते.