Hatkanangale Nagar Panchayat : हातकणंगलेच्या नगराध्यक्षपदी काँग्रेसच्या अर्चना जानवेकर यांची बिनविरोध निवड

हातकणंगले : इतर चारही उमेदवारांनी आपले अर्ज मागे घेतल्याने हातकणंगले नगरपंचायत नगराध्यक्षपदाच्या (Hatkanangale Nagar Panchayat) पोटनिवडणुकीत महाविकास आघाडीकडून काँग्रेसतर्फे अर्ज दाखल केलेल्या अर्चना जानवेकर (Archana Janvekar) यांची बिनविरोध निवड झाली. निवडणूक निर्णय अधिकारी म्हणून शक्ती कदम, तर सहायक निवडणूक निर्णय अधिकारी म्हणून मुख्याधिकारी विशाल पाटील यांनी काम पाहिले.

हातकणंगलेचे नगराध्यक्ष अरुणकुमार जानवेकर यांचे सहा महिन्यांपूर्वी निधन झाल्यांनंतर ही पोटनिवडणूक लागली होती. यासाठी कॉँग्रेसकडून (Congress) अर्चना जानवेकर, भाजपकडून उज्‍ज्वला कांबळे, तर परशुराम गवळी, संदीप कांबळे आणि नंदा चौगुले यांनी अपक्ष अर्ज दाखल केले होते. ही निवडणूक बिनविरोध करण्यासाठी शर्थीचे प्रयत्न सुरू होते. नेतेमंडळींना मान देत अखेरीस चारही उमेदवारांनी अर्ज मागे घेतले.

निवड बिनविरोध करण्यासाठी मंत्री चंद्रकांत पाटील, पालकमंत्री हसन मुश्रीफ, सुरेशराव हाळवणकर, आमदार प्रकाश आवाडे, भाजपचे नेते अरुणराव इंगवले, माजी मंत्री आमदार सतेज उर्फ बंटी पाटील, आमदार राजूबाबा आवळे, माजी आमदार डॉ. सुजित मिणचेकर, राजीव आवळे, राजू इंगवले, राहुल आवाडे, अजित काका पाटील, अजिंक्य इंगवले आदींनी प्रयत्न केले. दरम्यान, ११ तारखेला निवडणूक होणार होती. आता निवडणूक आयोगाकडे याबाबतची माहिती कळवली आहे. त्यांच्याकडून तसे निर्देश आल्यास ही निवडणूक बिनविरोध केल्याचे जाहीर होईल.

नगराध्यक्षपद प्रथमच बिनविरोध

थेट नगराध्यक्षपदी अरुण जानवेकर निवडून आले. मात्र, त्यांचे निधन झाल्याने त्यांच्या पत्नी अर्चना जानवेकर यांची बिनविरोध निवड झाली. त्यामुळे प्रथमच नगराध्यक्षपदाची निवडणूकही बिनविरोध झाली.