Kolhapur Politics : जे चांगलं आहे, त्याला निश्‍चित पाठिंबा दिला जाईल पण..; राजाराम कारखान्याबाबत काय म्हणाले सतेज पाटील?

कोल्हापूर : बनावट १२०० सभासद अपात्र झाल्याने पोटनियम बदलण्याऐवजी सत्ताधाऱ्यांनी बहुमताच्या जोरावर राजाराम कारखाना (Rajaram Sugar Factory) खासगी करून घेण्याचा ठराव मंजूर करून घ्यावा, पोटनियमातील बदल पाहता कारखाना खासगीकरणाकडे वाटचाल करत असल्याची टीका आमदार सतेज पाटील (Satej Patil) यांनी केली.

महापालिकेतील एका कार्यक्रमात आमदार पाटील यांनी प्रसार माध्यमांशी संवाद साधला. आमदार पाटील म्हणाले, ‘कसबा बावडा येथील छत्रपती राजाराम सहकारी साखर कारखान्याचे सहा तालुक्यांत कार्यक्षेत्र आहे. शाहूवाडीपासून राधानगरी तालुक्यातील चांदे-कोते पर्यंतचे कार्यक्षेत्र आहे. लोकांना वार्षिक सभेला येण्यासाठी वेळ लागतो. यासाठी सभेची वेळ सकाळी ११ ऐवजी दुपारी १ ची केली पाहिजे.

तसेच, कारखान्याच्या पोटनियमात अनेक बदल केले जात आहेत. १२०० सभासद अपात्र झाले, तोच पोटनियम नव्याने आणला जात आहे. त्यामुळे भाड्याने जमीन दिली तरी सभासद होता येते. पोटनियमातील बदल पाहिले, तर हा कारखाना खासगीकरणाकडे वाटचाल करत आहे. सहकारातील कारखाना वाचला पाहिजे. जे चांगले आहे त्याला निश्‍चित पाठिंबा दिला जाईल, असेही पाटील यांनी सांगितलं.

अनेक गावांमध्ये गेल्या निवडणुकीत आम्हाला मतदान मिळाले, त्यांचे ऊस पुरवठ्याचे करार करुन घेतले जात नाहीत. दुसरीकडे उसाचा तुटवडा असल्याने कोणत्याही गावातील कितीही ऊस आणला तरीही चालतो. मात्र, सत्ताधाऱ्यांना उसापेक्षा सांगली जिल्ह्यातील १२ गावे कार्यक्षेत्रात घेऊन त्यांना सभासद करून घ्यायचे आहे, अशी टीका पाटील यांनी केली.