दुष्काळी भागात फुलवले नंदनवन ; अडीच एकरात ड्रॅगन फ्रूटची शेती

संख (सांगली) : जत तालुक्‍यातील सोन्याळजवळ लकडेवाडी या कायम दुष्काळी, खडकाळ माळरानात चंद्राम पुजारी व अवण्णा पुजारी यांनी ड्रॅगन फ्रूट शेतीचा यशस्वी प्रयोग केला. ठिबक सिंचनवर त्यांनी अडीच एकरात ड्रॅगन फ्रूटची लागवड केली आहे. कमी पाणी, कमी खते, कमी खर्च आणि विशेष म्हणजे हमखास मागणी असलेले पीक घेऊन शेतकऱ्यांसमोर एक आदर्श घालून दिला आहे. नावीन्याचा ध्यास आणि शेतीला आधुनिकतेची जोड देऊन पुजारी बंधूनी धाडसाने ड्रॅगन फ्रूटची लागवड केली आहे.

हेही वाचा -  मास्क हनुवटीवर अन् पिचकारी रस्त्यावर !

सोन्याळपासून तीन किलोमीटरवर लकडेवाडी आहे. चंद्राम लायप्पा पुजारी यांनी पूर्वांपार शेती पद्धतीला बगल देत आधुनिक शेतीची वाट चोखाळली. पुणे येथून रोपे आणून अडीच एकरात लागवड केली. दीड एकराचा मळा बहरला आहे. जत दुष्काळी म्हणून ओळखला जातो. दुष्काळाच्या झळा सहन करणारा तालुका म्हणून पाहिले जाते. पावसाचे प्रमाण आणि थंडीही कमी. पारंपरिक पद्धतीनेच शेती केली जाते. नवीन प्रयोग क्वचित यशस्वी होतो. 

पुजारींची एक एकर डाळिंब बाग होती. दुष्काळ, टंचाईने वाया गेली. नुकसान झाले. शेतीतून बाहेर पडण्याचा विचार ते करीत होते. त्यांना ड्रॅगनची माहिती मिळाली. पहिल्यांदा दीड एकरात ११ फूट रुंद व ७ फूट लांब अंतरावर लागवड केली. पाण्यासाठी कूपनलिका घेतली. पाणी कमी असल्याने शेततळे तयार करून ठिबकचा वापर केला.

हेही वाचा - आता घड्याळाची टिकटिक होणार वेगाने -

पारंपरिक पिकांना फाटा 

ज्वारी, बाजरी, तूर, मका व इतर कडधान्ये पुजारी घेत. सततचा दुष्काळ, पावसाचा असमतोलामुळे बहुतांश शेती कोरडवाहू होती. नापिकीचा सामना करावा लागे. चंद्राम व बंधू अवण्णा पुजारींनी ड्रॅगनविषयी कृषी तज्ज्ञांकडून माहिती घेतली. प्रथम दीड, नंतर आणखी एक एकर लागवड केली. रोपे, सिमेंटचे चौकोनी ठोकळे, खांब, ठिबक सिंचनचा खर्च पाच लाख आला.

संपादन - स्नेहल कदम