निगेटिव्ह अहवाल पाहूनच कर्नाटकात प्रवेश द्या

कोगनोळी : कर्नाटक शासनाने दिलेल्या मार्गदर्शन तत्वाचे काटेकोरपणे पालन करा. बेळगाव जिल्हा हा सीमावर्ती भाग असल्याने महाराष्ट्रातून येणाऱ्या प्रवाशांचे कोरोना अहवाल निगेटिव्ह असल्याचे पाहूनच कर्नाटकात प्रवेश द्या. तसेच महाराष्ट्र व इतर राज्यातून येणाऱ्या प्रवाशांच्या नोंदी या ठिकाणी व्यवस्थित करण्याच्या सूचना जिल्हाधिकारी एम. जी. हिरेमठ यांनी दिल्या.

येथील दूधगंगा नदीवर असणाऱ्या कर्नाटक सीमा तपासणी नाक्याला भेटीप्रसंगी ते बोलत होते. यावेळी त्यांच्यासमवेत निपाणीचे तहसीलदार डॉ. मोहन भस्मे, निपाणी ग्रामीण पोलिस ठाण्याचे उपनिरीक्षक अनिल कुंभार उपस्थित होते. यावेळी कोगनोळी पोलिस ठाण्याचे सहाय्यक उपनिरीक्षक एस. ए. टोलगी, अमर चंदनशिवे, राजू गोरखनावर, एस. एस. काडगौडर यांच्यासह आशा कार्यकर्त्या, शिक्षक, आरोग्यसेविका उपस्थित होते.