खासदार माने, आमदारपुत्र राहुल आवाडेंच्या वाहनचालकांमध्ये फ्री स्टाईल हाणामारी; मुश्रीफांच्या दौऱ्यावेळी नेमकं काय घडलं?

इचलकरंजी : खासदार धैर्यशील माने (MP Dhairyasheel Mane) व आमदारपुत्र राहुल प्रकाश आवाडे (Rahul Prakash Awade) यांच्या वाहनचालकांमध्ये काल घोरपडे नाट्यगृह येथे जोरदार हाणामारी झाली. वाहन मागे-पुढे घेताना सुरू झालेला वाद अगदी फ्री स्टाईल हाणामारीपर्यंत पोहचला. पोलिसांनी हस्तक्षेप केल्यानंतर हा वाद थांबला. पालकमंत्री हसन मुश्रीफ यांच्या दौऱ्यावेळी हा प्रकार घडला.

हाणामारीचे व्हिडिओ समाज माध्यमात व्हायरल झाले. इचलकरंजीत पूर परिस्थिती निर्माण झाली आहे. त्याची पाहणी करण्यासाठी पालकमंत्री मुश्रीफ, खासदार माने येथे आले होते. पूर पाहणीनंतर त्यांचा ताफा पूरग्रस्त छावणी असलेल्या घोरपडे नाट्यगृह येथे आला.

सर्वजण नाट्यगृहात गेल्यानंतर पार्किंगसाठी वाहने मागे-पुढे करताना खासदार माने व आमदार प्रकाश आवाडे यांचे पुत्र राहुल आवाडे यांच्या वाहनांमध्ये घासाघासी झाली. त्यामुळे दोन्ही वाहनांच्या चालकांमध्ये वादावादी सुरू झाली. त्यानंतर शिवीगाळ सुरू झाली. शब्दाला शब्द वाढत गेल्यामुळे दोन्ही वाहनचालकांनी हाणामारी करण्यास सुरुवात केली. अगदी कमरेचा पट्टा काढून एकमेकांवर तुटून पडले. त्यामुळे अचानक वातावरण तापले.

या ठिकाणी अन्य अधिकारी व पदाधिकारी यांच्या वाहनांच्या चालकांनी दोघांना अडविण्याचा प्रयत्न केला. त्यावेळी शिवीगाळ करीत एकमेकांना खुन्नस दाखवित अंगावर धावून जाण्याचा प्रयत्न सुरूच ठेवला. या प्रकाराचे काहीजण चित्रीकरण करीत असल्याचेही त्यांना भान राहिले नाही. आरडाओरड सुरू असल्याचे पाहून पोलिस अधिकारी तेथे आले. त्यानंतर पोलिसांनी दोघांना बाजूला करीत वाद शांत केला. सर्वासक्षम घडलेल्या या घटनेची कोणतीही नोंद पोलिस ठाण्यात झाली नाही; मात्र दोन जबाबदार नेत्यांच्या चालकांमध्ये अचानक झालेल्या हाणामारीच्या प्रकाराची शहरात जोरदार चर्चा सुरू होती.