कोल्हापुरात पुनर्वसनासाठी आजपासून तालुकानिहाय बैठका

कोल्हापूर: कायमस्वरूपी पुनर्वसनासाठी आज (ता. २०) किंवा शनिवारी तालुकानिहाय लोकप्रतिनिधी, आमदार, खासदार, तहसीलदार, गटविकास अधिकाऱ्यांची बैठक घेऊन कायमस्वरुपी पुनर्वसनाचा आराखडा करणार असल्याची माहिती पालकमंत्री सतेज पाटील यांनी पत्रकार परिषदेत दिली. पूरग्रस्तांना सानुग्रह अनुदानासाठी सतरा कोटी जमा झाले आहेत. आजपासून पूरग्रस्तांना दहा हजार सानुग्रह अनुदान खात्यावर देण्याचे काम सुरू होईल. साधारण आठवड्यात ते पूर्ण केले जाईल. काही ठिकाणी पाणी ओसरण्यास वेळ लागल्यामुळे शेतीचे पंचनामे झालेले नाहीत ते मंगळवारपर्यंत पूर्ण करण्याच्या सूचना प्रांताधिकाऱ्यांना दिल्याचेही पालकमंत्री पाटील यांनी सांगितले.

शासनाच्या कोणत्या योजनेतून पूरग्रस्तांचे पुनर्वसन होईल याची माहिती दिली जाईल. रमाई, शबरी, पंतप्रधान आवास, यासह इतर राज्य आणि केंद्र शासकीय योजनांची माहिती, किती जमीन उपलब्ध आहे, किती कुटुंबाचे पुनर्वसन होणार याची माहिती दिली जाईल, त्यानंतर तो परिपूर्ण आराखडा तयार होईल, अशीही माहिती पालकमंत्री पाटील यांनी दिली. शहरातील रस्त्यांसाठी निधी मंजूर झाला असून त्याची निविदा प्रक्रिया पूर्ण करून डिसेंबरपासून काम सुरू होईल, पूरग्रस्त भागात साधारण १३ प्रभागातील कामांना येथे प्राधान्य दिले जाणार असल्याचेही त्यांनी सांगितले.

पंचनामे, अनुदान वाटपामुळे ऑक्टोबर ३१ नंतरच ओढ्यांची स्थिती, त्यांचे मोजमाप, रूंदी यांची माहिती घेण्याचे काम सुरू होईल. त्याचे नकाशे तयार आहेत, त्याची आणि सध्याची नेमकी स्थिती काय आहे याची माहिती घेतली जाईल. त्यानंतर गाळ काढणे, रुंदी, खोली वाढविणे यासह इतर कामांना प्राधान्य दिले जाईल. हेच काम शहरासह जिल्ह्यात होईल, असेही पालकमंत्री सतेज पाटील यांनी स्पष्ट केले.

आरोपांची शहानिशा करू

कोल्हापूर शहरात झालेली पूररेषा चुकीची असून पूर्वीची बदलून ५०० हेक्टर जमीन सोडविल्याचा आरोप एनजीओंकडून केला असल्याबद्दल विचारले असता हा विषय पूर्वीच्या सरकारमधील आहे. त्याची टेक्निकल माहिती घेऊ. नेमके हे आरोप का झाले आहेत, याची माहिती घेतली जाईल. त्यानंतर योग्य ती निर्णय घेतला जाईल, असेही पाटील यांनी सांगितले.