Maratha Reservation : मराठ्यांना आरक्षण देण्यासाठी सरकारचे युद्धपातळीवर प्रयत्न सुरू; खासदार मानेंची माहिती

पन्हाळा : मराठा समाजाला आरक्षण (Maratha Reservation) देण्यासाठी शासनाचे युद्धपातळीवर प्रयत्न सुरू आहेत. यामध्ये पश्‍चिम महाराष्ट्रातील जिल्हे सामील करण्यासाठी मी स्वतः प्रयत्न करीन. वयाचा विचार करून उपोषण सोडावे, अशी विनंती खासदार धैर्यशील माने (Dhairyasheel Mane) यांनी केली.

पण, उपोषणकर्ते उपोषणावर ठाम राहिले. पन्हाळा तहसील कार्यालयासमोर जाफळेतील दोघांनी मराठा आरक्षणासाठी बेमुदत उपोषण सुरू केले आहे. सातव्या दिवशी उपोषणस्थळी खासदार धैर्यशील माने यांनी भाजपा जिल्हा उपाध्यक्ष सचिन शिपुगडे, माजी उपनगराध्यक्ष रवींद्र धडेल, माजी पं. समिती सभापती अनिल कंदूरकर व मान्यवरांसमवेत भेट दिली.

आरक्षण देण्यासाठी शासन प्रयत्न करत आहे. याबाबत जिल्हाधिकाऱ्यांशी बोलून आरक्षण समिती जिल्ह्यात आणण्यासाठी वरिष्ठ पातळीवर प्रयत्न करीन. सरकारने दिलेली मुदत संपेपर्यंत उपोषण स्थगित करावे; असे आवाहन खासदार धैर्यशील माने यांनी केले. यावर प्रतिक्रिया देताना उपोषणकर्त्यांनी मराठा आरक्षण मिळाल्याखेरीज उपोषण सोडणार नसल्याचे सांगितले.