Hajj Pilgrims : उष्माघातामुळं तब्बल 900 हून अधिक हज यात्रेकरूंचा मृत्यू; कोल्हापुरातील 444 हज यात्रेकरू सुखरूप

कोल्हापूर : सौदी अरेबियातील मक्का (Hajj Yatra 2024) आणि मदिना येथे हजसाठी येणाऱ्या यात्रेकरूंना कडाक्याच्या उन्हाचा फटका बसलाय. सौदी अरेबियाच्या सरकारी टीव्हीनं सांगितलंय की, मक्कामधील मशिदीचं तापमान सोमवारी 51.8 अंश सेल्सिअसवर पोहोचलं. त्याचवेळी, उष्णतेमुळं आतापर्यंत 35 पाकिस्तानी नागरिकांसह 900 हून अधिक हज यात्रेकरूंचा मृत्यू झाला आहे.

दरम्यान, कोल्हापूर जिल्ह्यातील ४४४ हज यात्रेकरू (Hajj Yatra Heatstroke) सुखरूप आहेत. त्यांपैकी चौघे हरवले होते. ते पुन्हा सुखरूप त्यांच्या गटामध्ये सहभागी झाले. उष्माघाताने त्यांना त्रास होणार नाही यासाठी सौदी सरकारकडून तेथे कृत्रिम पाऊस पाडल्याचेही सांगण्यात आले. दरम्यान, सांगलीतील एका अभियंत्याच्या बहिणीचा मृत्यू झाला. त्याबाबत अधिक माहिती महाराष्ट्र राज्य हज समिती आणि भारत हज समितीच्या माध्यमातून घेतली जात आहे.

जिल्ह्यातील ३१९ हज यात्रेकरून राज्य आणि भारत या दोन्ही समितीच्या माध्यमातून पोहोचले आहेत. तसेच खासगी टूर कंपनीकडून १२५ हज यात्रेसाठी गेले आहेत. ग्लोबल वॉर्मिंगमुळे (Global Warming) सौदीमध्ये पन्नास अंश डिग्री सेल्सिअसवर तापमान पोहोचले आहे. मक्का येथून सर्वजण ‘मीना’ शहरात पोहोचले आहेत. तेथील ‘आराफत’ मैदानावर त्यांची तंबूमध्ये राहण्याची व्यवस्था केली आहे.

‘जमरात’ येथे तीन सैतानांचे स्तंभ आहेत. त्यांना प्रत्येकी सात दगड मारण्याची प्रथा आहे. तेथे सध्या कोल्हापूर जिल्ह्यातील यात्रेकरू आहेत. दरम्यान, जिल्ह्यातील चौघेजण हरवले होते; मात्र त्यांच्याकडील बॅण्डवरून त्यांना पुन्हा त्यांच्या गटात सोडले आहे. या बॅण्डमध्ये संबंधित व्यक्तीचे नाव, कोठून आली, कोठे जाणार आहे, गाव, जिल्हा, राज्य, देश, सौदीत त्यांचे राहण्याचे ठिकाण याची माहिती असते.

पत्नीने पतीच्या शोधासाठी केले प्रयत्न

भवानी मंडप येथील वडेवालेचाचा अस्लम बागवान हे दोन दिवस बेपत्ता होते. त्यांनी येथे कोल्हापुरात समीर मुजावर यांच्याशी संपर्क साधला. त्यांनी याची माहिती ग्रुपवर शेअर केली. त्यानंतर ‘चारमिनार’ येथील हॉटेलचा मॅप त्यांना देण्यात आला. त्या आधारे ते गटात सुखरूप पोहोचले. दरम्यान, त्यांच्या पत्नीने पतीच्या शोधासाठी अनेक प्रयत्न केले. अखेर आज त्यांचे पती अस्लम यांची भेट झाली.