Kolhapur Bandh : अमानुष लाठीमाराच्या निषेधार्थ कोल्हापूर कडकडीत बंद; तब्बल 300 कोटींची उलाढाल ठप्प, सर्व घटकांचा आंदोलनाला पाठिंबा

कोल्हापूर : जालना जिल्ह्यातील अंतरवाली सराटी येथे (Jalna Maratha Reservation) मराठा आंदोलकांना (Maratha Andolan) झालेल्या अमानुष लाठीमाराच्या निषेधार्थ कोल्हापुरात काल (मंगळवार) सकल मराठा समाजातर्फे कडकडीत बंद (Kolhapur Bandh) पाळण्यात आला. समाजाने दिलेल्या हाकेला व्यापारी, व्यावसायिक, उद्योजकांनी प्रतिसाद दिला.

त्यामुळे सुमारे ३०० कोटींची उलाढाल ठप्प झाली. औद्योगिक वसाहतींमधील बहुतांश कारखान्यांतील यंत्रांची धडधड बंद होती. समाजाने सोमवारी दसरा चौकात ‘जबाव दो’ आंदोलन करून मंगळवारी कोल्हापूर बंद पुकारला. त्याला प्रतिसाद म्हणून व्यापारी, व्यावसायिकांनी दुकाने बंद ठेवली.

लक्ष्मीपुरीतील धान्य बाजार, शाहूपुरी, राजारामपुरी, महाद्वाररोड, लक्ष्मीरोड, शिवाजीरोड, बाजारगेट, लुगडी ओळ, पापाची तिकटी, महापालिका परिसर आदी बाजारपेठांमध्ये शुकशुकाट होता. शिवाजी उद्यमनगर, वाय. पी. पोवारनगर परिसरातील वाहनांच्या शोरूम, गॅरेज, मशिन शॉप बंद होती.

त्याबाबतचे फलक त्यांनी दरवाजांवर लावले होते. दुकाने, व्यापार-व्यवसाय बंद राहिल्याने नेहमीच्या गजबजलेल्या ठिकाणी वर्दळ नसल्याने शांतता होती. औषध दुकाने सुरू होती. दरम्यान, सायंकाळी पाचनंतर शहर आणि उपनगरातील काही दुकाने अर्धे शटर उघडून सुरू झाली.

सकल मराठा समाजाने पुकारलेल्या कोल्हापूर बंदला व्यापारी, व्यावसायिक, उद्योजकांनी पाठिंबा दिला. बंदमुळे सुमारे ३०० कोटींची उलाढाल ठप्प झाली. त्यात धान्य, कपडे, सराफ, इलेक्ट्रॉनिक साहित्य, गणेशोत्सवासाठीचे डेकोरेशन साहित्य आदी बाजारपेठांतील उलाढालीचा समावेश आहे.

- संजय शेटे, अध्यक्ष, कोल्हापूर चेंबर ऑफ कॉमर्स

सराफ बाजार बंद

गुजरी परिसरातील सराफ व्यावसायिक, व्यापाऱ्यांनी दुकाने बंद ठेवून समाजाला पाठिंबा दिला. सराफ बाजार कडकडीत बंद पाळण्यात आल्याचे कोल्हापूर सराफ व्यापारी संघाचे अध्यक्ष राजेश राठोड यांनी सांगितले.

यंत्रांची धडधड थांबली

शिरोली, गोकुळ शिरगाव, कागल-हातकणंगले पंचतारांकित औद्योगिक वसाहतीमध्ये काही उद्योजकांनी कारखाने बंद ठेवले. एस. टी. आणि केएमटी बस सेवा बंद राहिली. अत्यावश्‍यक आणि जीवनावश्‍यक उत्पादनांचे कारखाने सुरू राहिल्याचे ‘गोशिमा’चे अध्यक्ष दीपक चोरगे यांनी सांगितले.