केशवराव भोसले नाट्यगृह जळून खाक; फॉरेन्सिक तपासणीत 28 नमुने संकलित, आगीचे नेमके कारण होणार स्पष्ट

कोल्हापूर : संगीतसूर्य केशवराव भोसले नाट्यगृहाच्या (Keshavrao Bhosale Theatre Fire) जळालेल्या भागाचे नमुने काल न्यायसहायक वैज्ञानिक प्रयोगशाळेच्या (Forensic) अधिकाऱ्यांनी संकलित केले. या नमुन्यांची प्रयोगशाळेत तपासणी केली जाणार आहे. त्यानंतर आगीचे नेमके कारण स्पष्ट होईल.

केशवराव भोसले नाट्यगृहाला गुरुवारी (ता. ८) रात्री आग लागली. यामध्ये नाट्यगृह जळून खाक झाले. काल फॉरेन्सिक विभागाच्या अधिकाऱ्यांनी केशवराव भोसले नाट्यगृहाची पाहणी केली. दुपारी दोन वाजण्याच्या सुमारास हे पथक येथे दाखल झाले.

पोलिस, महापालिका अधिकारी, अग्निशमन दलाचे जवान यावेळी उपस्थित होते. फॉरेन्सिक विभागाच्या पथकामध्ये सहा जणांचा समावेश होता. सहायक रासायनिक विश्लेषक श्रीमती गायकवाड आणि गोडबोले यांनी या पथकाचे नेतृत्व केले. सुरुवातीला या पथकाने आग कशी लागली, याची संपूर्ण माहिती घेतली.

त्यानंतर नाट्यगृह, कुस्ती मैदान याची पाहणी करून त्यांनी ठिकठिकाणचे २८ नमुने संकलित केले. यामध्ये कुस्ती मैदानाचे व्यासपीठ, नाट्यगृहातील खुर्च्या, रंगमंच, दरवाजे येथील नमुने संकलित केले. या नमुन्यांची प्रयोगशाळेत तपासणी केली जाणार आहे. त्याचा अहवाल ते शासनाला सादर करतील.